Jastarǵa barynsha qoldaý kórsetemin – Prezıdent dalalyq lagerde sarbazdarmen birge tamaqtandy
Prezıdent sarbazdarmen birge túski as ishti. Aqorda jarııalaǵan vıdeoǵa qarasaq, dastarhanǵa sý, sháı, alma, qaraqumyq jáne gematogen shokoladtary qoıylǵan.
«Men ádeıi Astanadan keldim, jattyǵýlaryńyzdy kórdim. Qyzmetterińiz oıdaǵydaı bola beredi dep oılaımyn. Bul – el úshin, halqymyz úshin qyzmet. Budan joǵary qasıetti qyzmet joq. Sondyqtan bárimiz el bolyp, birtutas memleketke qyzmet eteıik», - dedi Memleket basshysy.
Kezdesýde merzimdi qyzmettegi qostanaılyq sarbaz ásker týraly óz pikirin bildirdi.
«Áskerge barmaı turyp-aq, álimjettik baryn aıtyp, bir jylyńdy bosqa joǵaltasyń dep jıi qorqytatyn. Biraq áskerge kelgende óz salamdy tapqanymdy túsindim. Desant ekenimdi maqtan tutamyn, ofıtser-serjanttar baýyrlarymdaı bolyp ketti. Qorǵanys mınıstrligine áskerı salany damytyp jatqany úshin alǵys aıtamyn. Osy arqyly joǵary oqý ornyna túsýge de bolady. Jastar qoldaý kórsetkenińiz úshin kóp rahmet», - dedi ol.
Prezıdent te memlekettiń keleshegi jastardyń qolynda ekenin, múmkindiginshe jastarǵa qoldaý kórsetetinin jetkizdi.
«Bar kúshimmen jastarǵa qoldaý kórsetemin, jaǵdaı jasaýǵa tyrysamyn. Bizdiń elimiz jas memleket bolyp sanalady. Azamattarymyzdyń ortasha jasy 32-de. Biz beıbit jasampaz ómir ornatqymyz keledi. Eshkimmen soǵyspa, barlyq memleketpen dostyq qarym-qatynasta bolǵymyz keledi. Qazir osyndaı saıasatty júrgizip jatyrmyn, dıplomatııany júzege asyryp kelemin. Degenmen, elimizdiń áskeri de tolyq jaýyngerlik daıarlyqta bolýy kerek. Men osy oqýlardy kórýge keldim. Armııasyz memleket bolmaıdy. Biz beıbit qurylymmen aınalysamyz, reformalar júrgizemiz, eń aldymen jastar úshin jaǵdaı jasaımyz. Bizdiń jastarymyz aqyldy, ushqyr, kókiregi oıaý, kózi ashyq. Sondyqtan eń aldymen jastarǵa qol ushyn beremin», - dedi Prezıdent.
Aıta keteıik, búgin Memleket basshysy Qasym-Jomart Toqaev Almaty oblysynda ótip jatqan «Batyl toıtarys-2023» strategııalyq komandalyq-shtabtyq áskerı oqý-jattyǵý jıynyn baryp kórdi.
Joǵarǵy Bas qolbasshy áskerı qyzmetshiler aldynda sóz sóılep, Qazaqstan armııasy kez kelgen syn-qaterge daıyn bolýy qajet ekenin atap ótti.