Jastarǵa arnalǵan turǵyn úı baǵdarlamalary qaıta qaralmaq

ASTANA. QazAqparat – Elimizde jastar sanatyna kiretinder sany ulǵaıýyna baılanysty jeńildikpen jalǵa beriletin turǵyn úı baǵdarlamasyna ózgerister engizý qarastyrylyp jatyr. Bul týraly QR Aqparat jáne qoǵamdyq damý vıtse–mınıstri Danııar Qadyrov málim etti, dep habarlaıdy QazAqparat tilshisi.

«Jastar sanatyna kiretinder 29-dan 35 jasqa deıin ulǵaıtylǵany belgili. Atalǵan sanatty ózgertkenge deıin elimizde 3,7 mln jas bolsa, uzartylǵannan keıin olardyń sany 5,8 mln-ǵa jetti. Demek jastar saıasatynyń aıasy da keńeıe túspek. Máselen, «Táýelsizdik urpaqtary», «Zhas Project», «Daryn» syılyqtary, odan basqa bıznes jobalarǵa qatysý men memlekettik granttar alý múmkindigi artady. Sol sııaqty jergilikti atqarýshy organdarǵa jastarǵa jeńildikpen jalǵa beriletin turǵyn úı baǵdarlamasyn ázirlep, iske asyrý boıynsha jańa quzyret berýge baǵyttalǵan túzetýler qarastyrylyp otyr. Ákimdikter «Otbasy bankimen» birlesip 35 jasty qosa alǵanda, azamattar qatysa alatyn jastarǵa arnalǵan óńirlik turǵyn úı baǵdarlamalaryn ázirleı alady»,- dedi Danııar Qadyrov Ortalyq kommýnıkatsııalar qyzmeti alańynda ótken baspasóz máslıhatynda.

Mınıstr orynbasarynyń aıtýynsha, jastar saıasaty týraly jańa zań – atalǵan salany jetildirýge, qoǵamdyq qatynasty retteýdiń quqyqtyq negizin qalyptastyrýǵa jáne jastardy eńbekpen qamtýdy arttyrýǵa baǵyttalǵan.

Eske salsaq, byltyr qazanda Parlament Májilisi «Qazaqstan Respýblıkasynyń keıbir zańnamalyq aktilerine memlekettik jastar saıasaty máseleleri boıynsha ózgerister men tolyqtyrýlar engizý týraly» zań jobasyn maquldaǵan edi.