Jastarǵa arnalǵan 2,5 paıyzdyq nesıeni alý úshin kepilge ne qoıý kerek

ASTANA. QazAqparat – 21-35 jas aralyǵyndaǵy azamattar «Agrarlyq kredıttik korporatsııasy» arqyly 2,5 paıyzdyq nesıe alý úshin mindetti túrde kepil qoıý kerek, dep habarlaıdy QazAqparat tilshisi.

Bul jaıynda ortalyq kommýnıkatsııalar qyzmetinde ótken brıfıngide aıtyldy.

BAQ ókilderiniń saýalyna jaýap bergen Eńbek jáne halyqty áleýmettik qorǵaý mınıstrliginiń mamandary atalǵan nesıe alý úshin mindetti túrde kepilge múlik qoıý kerektigin túsindirdi.

Olardyń aıtýynsha, kepildik retinde jyljymaıtyn múlik pen arnaıy tehnıka qoıylady.

«Jastarǵa mıkrokredıt berý jańa qural bolmaq. Kredıtter 21-den 35 jasqa deıingi aralyqtaǵy jastarǵa beriledi. Bul rette paıyzdy mólsherleme 2,5 paıyz bolady. Merzimi – 5 jylǵa deıin. Al mal sharýashylyǵy baǵytynda alsa, 7 jylǵa deıin. Sonymen qatar negizgi qaryz ben syıaqyny óteý boıynsha jeńildikti kezeń beriledi. Onyń uzaqtyǵy mıkrokedıt merziminiń úshten birinen aspaýy kerek. Bul kredıtterdi «Agrarlyq kredıttik korporatsııa» AQ beredi», - dedi vıtse-mınıstr Oljas Ordabaev.