Jastardyń tárbıesine erekshe mán berý kerek – Qorǵanys mınıstri

NUR-SULTAN. QazAqparat – Qorǵanys mınıstri Rýslan Jaqsylyqov áskerde jastar arasyndaǵy shıeleniske jol bermes úshin olardyń tárbıesine nazar aýdarý kerek ekenin aıtty. Óıtkeni jas sarbazdar bir merzimde birge shaqyrylǵan qatarlastarymen kelispeı jatady, dep habarlaıdy QazAqparat tilshisi.

«Bul problemany egjeı-tenjeıli zerdeleý kerek. Jastar arasynda ne sebepti osyndaı qarym-qatynas qalyptasqan? Qazirgi kezde sarbaz tek bir jyl ǵana qyzmette bolady. 12 aıdan keıin úıine oralady», - dedi R.Jaqsylyqov Májilistiń jalpy otyrysynan keıin tilshiler saýalyna jaýap berip.

Ol keńestiń kezeńde jastar eki-úsh jyl áskerde bolǵanyn da eske saldy.

«Al qazir merzimdi áskerı boryshyn ótep júrgender bir jyl qyzmette bolady. Bul rette 18-19 jastaǵy balalar arasynda qandaı álimjettik ahýal bolýy múmkin? Qatarlastarymen kelispeı qalýy yqtımal, óıtkeni áskerde tek er adamdar», - dedi vedomstvo basshysy.

Mınıstr jastar arasyndaǵy kıkiljiń kóshede de jıi kezdesetinin aıtty.

«Sondyqtan jastardyń tárbıesine mán berý kerek. Bul jastardy oqytý men tárbıeleý - bizdiń ortaq mindetimiz», - dedi Rýslan Jaqsylyqov.

Budan buryn habarlanǵandaı, búgin Qorǵanys mınıstri Rýslan Jaqsylyqov merzimdi áskerı boryshyn ótep júrgender arasynda óz-ózine qol jumsaý jaǵdaılaryna qatysty pikir bildirdi.

Jaqynda Mańǵystaý oblysynda shekara qyzmetinde áskerı boryshyn ótep júrgen sarbaz óz-ózine qol jumsaǵan bolatyn.

Aıta keteıik, Prezıdent armııada ólim-jitimniń jıileýine baılanysty komıssııa qurýdy tapsyrdy.