Jastardyń «Aıbyn-2023» halyqaralyq áskerı-patrıottyq jıyny ótedi
Qorǵanys mınıstrliginiń baspasóz qyzmetinen málim etkendeı, jıynǵa qatysý úshin Qaraǵandy oblysyna óńirlerdegi áskerı-patrıottyq klýbtar kele bastady.
«Shahterler astanasynyń» temirjol vokzalyna alǵashqy bolyp, Soltústik Qazaqstan, Jambyl oblystary men Shymkent qalasy áskerı-patrıottyq klýbtarynyń ókilderi, sondaı-aq Almaty, Shymkent qalalarynyń «Jas ulan» respýblıkalyq mektepteriniń tárbıelenýshileri kelip jetti. Uıymdastyrýshylar jıynǵa qatysýshylardy áskerı orkestr únimen qarsy aldy.
«Spassk» oqý ortalyǵynyń aýmaǵynda shatyrly lager quryldy. Onda 43 komandaǵa toptasqan 700-den astam jasóspirim men oqýshylar ornalasatyn bolady. Baıqaýǵa qatysatyn jas sanaty – 14-17 jas.
Іs-sharaǵa Qazaqstannyń barlyq óńirlerinen jastar jınalady. Oǵan Qarýly kúshterdiń, basqa da áskerler men áskerı quralymdardyń áskerı-patrıottyq klýbtarynyń, Saǵadat Nurmaǵambetov atyndaǵy áskerı kolledjdiń, «Jas ulan» respýblıkalyq mektepteriniń, konkýrstyq irikteýden ótken oblystyq áskerı mektep-ınternattardyń tárbıelenýshileri qatysady. Bıylǵy jıynǵa alǵash ret Ázerbaıjan men Ózbekstannyń komandalary shaqyrylyp otyr.
Jıyn baǵdarlamasynda «Aıbyn daryny» zııatkerlik oıyny jáne «Kúshimiz – birlikte» áskerı-dalalyq taktıkalyq oıyny, «Aıbyn juldyzy» shyǵarmashylyq baıqaýy jáne Smart Sarbaz robototehnıka saıysy bar. Áskerı-sporttyq, áskerı-qoldanbaly sport túrleri jáne áskerılendirilgen estafeta boıynsha jarystar ótkizý úshin alańdar daıyndaldy.
Jıynda áskerı tehnıka kórmesi, fılmder kórsetilimi, murajaıdyń kóshpeli ekspozıtsııasy uıymdastyrylady. Balalardy sporttyq oıyndar, alaý janyndaǵy keshter men ınteraktıvti kontsert kútedi. Baıqaýǵa qatysýshylar «Aıbyn – dostyq mekeni» saıabaǵyna aǵash otyrǵyzady. Tanymal adamdarmen, ardagerlermen, medıa tulǵalarmen kezdesýler ótedi.
Budan bólek, «Birlik ordasy» kórmesi uıymdastyrylady. Onda Qazaqstan, Ázerbaıjan jáne Ózbekstannyń jas patrıottary óz halqynyń mádenı jetistikterin, úzdik dástúrleri men ádet-ǵuryptaryn kórsetetin bolady.