Jastardyń áleýmettik bastamalary qarjylyq qoldaýdy qajet etedi - sarapshy
«Memleket basshysy Jastar jylynyń ashylý saltanatynda qazaqstandyqtardyń jas kezinen jan jaǵynda bolyp jatqan oqıǵalarǵa qatysýshylyǵy men yntymaqtastyǵyn úıretý qajettiligin atap ótti. Bul qasıetterge qol jetkizýdiń tıimdi ádisteriniń biri - eriktiler qozǵalysyna jastardyń qatysýy. Óz kezeginde, volonterlik tujyrymdama qazaqstandyqtarǵa jat emes. Ejelgi zamannan beri qazaq qoǵamynda shynaıy jáne aqysyz kómek kórsetý tájirıbeleri kezdesedi, onyń biri - «Asar», - deıdi Slıamjar Ahmetjarov.
S.Ahmetjarov búgingi tańda mektepter men ýnıversıtetterdiń stýdentteri egde jastaǵy adamdarǵa kómek kórsetý, mádenı eskertkishterdi qorǵaý nemese jergilikti jáne respýblıkalyq deńgeıde is-sharalar uıymdastyrý arqyly ózderin kórsete alatyndyǵyn atap aıtty.
«4,5 myń eriktiler «EKSPO-2017» mamandandyrylǵan halyqaralyq kórmesine qatysty. Osy jastar tek halyqaralyq oqıǵaǵa óz úlesterin qosyp qana qoımaı, jańa dostar taýyp, qajetti tájirıbege ıe boldy. Sondaı-aq, túrli áleýmettik jobalardy iske asyrýda jas qazaqstandyqtardyń belsendiligin atap ótý kerek. Mysaly, Nazarbaev Ýnıversıtetiniń stýdentteri aýyldaǵy balalarǵa arnalǵan 3 aptalyq aǵylshyn tili kýrsy «Hello, Aul!» volonterlik baǵdarlamasyn uıymdastyrdy. Osy baǵdarlama aıasynda Nazarbaev Ýnıversıtetiniń stýdentteri jazǵy demalystarda birqatar aýyldardy aralap, balalar arasyndaǵy aǵylshyn sóıleý tiliniń daǵdylaryn jaqsartty», - deıdi ol.
Mamannyń pikirinshe, jas qazaqstandyqtardyń áleýmettik bastamalary qarjylyq qoldaýdy qajet etedi.
«Bul máseleni sheshý úshin bıznes-qoǵamdastyqtar tarapynan qoldaý qajet. Jastardyń áleýmettik bastamalary men umtylystarynyń júzege asyrylýyna járdemdesý olarǵa tek jaqsy qasıetter ǵana emes, sonymen birge qazaqstandyq qoǵamnyń damýyna jańa serpin beredi», - dep atap ótti sarapshy.