Jastardy jumyspen qamtý: Almatyda mobıldi pýnkter jumysyn bastady

ALMATY. QazAqparat – 18 tamyzda Almaty qalasynyń barlyq aýdanynda jastardy jumysqa ornalastyrý jónindegi jastar resýrstyq ortalyqtarynyń jyljymaly pýnkteri jumys isteı bastady, dep habarlaıdy QazAqparat tilshisi.

Bir apta boıy Jumyspen qamtý ortalyǵynyń «Jastar praktıkasy» jáne «Qoǵamdyq jumystar» baǵdarlamalary boıynsha túsindirý jumystary men jastardy tirkeý júrgiziledi.

Aýdandardaǵy jastar resýrstyq ortalyqtarynyń belsendileri jastarǵa aqparattyq paraqshalar taratatyn bolady.

Jumys isteýge nıetti jastarǵa túrli baǵyttaǵy bos jumys oryndary usynylady. Árbir jumys izdeýshi saýalnama-túıindeme toltyra alady. Olar óńdelgennen keıin Almaty qalalyq halyqty Jumyspen qamtý ortalyǵynyń ókilderine tapsyrylady jáne «Shuǵyl talap etiledi» gazetiniń saıtynda jarııalanady.

Jyljymaly pýnkterdiń jumys oryndarynda sanıtarlyq normalar saqtalady: qyzmetkerler maska taǵyp, áleýmettik qashyqtyqty saqtaı otyryp ótinimderdi qabyldaıdy.

Jyljymaly pýnkter ornalasatyn jerler:

Alataý aýdany –«Nurkent» yqshamaýdany 5/6 ;

Almaly aýdany – Jibek Joly-Panfılov (Arbat) kósheleriniń qıylysy;

Áýezov aýdany – Abaı-Altynsarın kósheleriniń qıylysy (Moskva SOO, «Tıgrahaýd» bazary);

Bostandyq aýdany – Tımırıazev kóshesi 42 («Atakent»);

Jetisý aýdany – «Aınabulaq –1» yqshamaýdany, Jumabaev-Maqataev kósheleriniń qıylysy («Aınabulaq» bazary) ;

Medeý aýdany – Jibek Joly-Pýshkın-Raıymbek kósheleriniń qıylysy («Kók bazar», Ortalyq meshit, «Saıahat» avtobeketi);

Naýryzbaı aýdany – «Shuǵyla» shaǵynaýdany;

Túrksib aýdany – Sholohov kóshesi 2/1 («Almaty–1»);.