Jastardy ǵana oqytý prıntsıpinen bas tartý kerek – Áset Isekeshev
«Keıingi onjyldyqta kóptegen ózgerister boldy. Eńbek sıpaty, ekonomıkalyq trendter qubylyp tur. Biz sanktsııalyq qaqtyǵystardy kórip otyrmyz. Malaızııada ótken jahandyq ınnovatsııalyq sammıtte tehnologııalyq damý arqyly bolashaq qoǵamdy qalyptastyrý máselesi talqylanǵan bolatyn. Damýshy ekonomıkalardyń saıasatyna tehnologııalar tikeleı áser etýde. Biz iri qalalar dáýirinde ómir súrip otyrmyz. Sol úrdisten qalmaý úshin talanttar men ınnovatsııaly sheshimderdi, iri ǵylymı ınstıtýttardy, kishi jáne shaǵyn bıznesti keńinen tarta bilý kerek. Qazir aqparat jyldam eskiretin boldy. Sondyqtan da adamı kapıtaldy damytý ekonomıkanyń negizi bolýy tıis», - degen Áset Isekeshev.
Ol talanttyń jas talǵamaıtynyn da atap ótti.
«Jastarǵa ǵana bilim berip, solardy ǵana oqytý kerek degen túsinikten bas tartýymyz kerek. 2018 jyly BUU-nyń Talanttar jónindegi komıteti startaptar basty róldi atqaryp otyrǵanyn málimdedi. Startap uǵymy jańa ekonomıkalyq sanatqa aınalýda. Mysaly, 2017 jyly AQSh-taǵy startaptar 1,1 mln jumys ornyn ashqan. Táýelsizdiktiń alǵashqy jyldarynda bizde gıperınflıatsııa bolyp, jumyssyzdar sany 2 mln adamǵa jetken bolatyn. Bir jyldyń ishinde jalpy ishki ónim 60 paıyzǵa quldyrady. 30 jylda bul kórsetkish 11 mlrd AQSh dollarynan 111 mlrd dollarǵa ósti. Orta Azııadaǵy jalpy ishki ónimniń 60 paıyzy Qazaqstanǵa tıesili. Qazaqstanǵa osy jyldary 300 mlrd dollardyń ınvestıtsııasy tikeleı quıyldy. Bıznesti júrgizý jeńildigi boıynsha 12-orynda turmyz. Ómir surý uzaqtyǵy 72 jastan asty. «Bolashaq» baǵdarlamasy boıynsha myńdaǵan stýdentti shetelden oqyttyq. Bes jyl buryn Qazaqstannyń orta kiris habyna kirdi», - dedi Qor basshysy.
Eske salsaq, búgin elordada «Báskelestik transformatsııasy! Ulttar – Energııa – Indýstrııalar – Qalalar – Talanttar» degen taqyryppen Ǵalamdyq ınnovatsııalyq sammıt ótip jatyr.