Jastardy elin súıýge tárbıeleý mańyzdy - MMA sheberi Nursultan Orynbasarov
Nursultan Orynbasarov tanymal MMA sheberi, «Nur Otan» partııasy Іle aýdandyq fılıalynyń múshesi, djıý-djıtsýdan jáne grepplıngten halyqaralyq týrnırlerdiń birneshe dúrkin chempıony. Onyń pikirinshe, Memleket basshysynyń qoldaýymen jastar sportyna, sonyń ishinde aýyl sportyna bólinip otyrǵan kóńil deni saý ultty qalyptastyrýdyń negizi.
«Elbasy N.Á. Nazarbaevtyń 2019 jyldy Jastar jyly dep ataýy Qazaqstan jastaryna úlken jiger berip otyr. Jastar jyly men úshin de, meniń komandam úshin de sáttilikke jetkizetin sara joldyń biri bolady dep oılaımyn. Bulaı deıtinim, Prezıdent ózi qoldap otyrǵan sport salasynda birshama jańalyqtar bolýda. Sonyń biri - «Aýylyn kórip azamatyn tany» demekshi, aýyl sportyn damytý maqsatynda 2015 jyly Іle aýdany, Túımebaev aýylynda Qazaqstan Respýblıkasynyń tuńǵysh qorǵanys mınıstri Saǵadat Nurmaǵanbetovtyń qurmetine «Saǵadat batyr» sport klýby ashylǵan bolatyn. Klýbta jattyǵatyn sportshylarymyz baıraqty básekelerde el úmitin aqtap, chempıon atanýda. Taǵy da aıta ketetinim, Іle aýdandyq «Nur Otan» partııasy fılıalymen birigip, balalar, jasóspirimder jáne jastar arasynda grepplıngten, aralas jekpe-jekten jáne djıý-djıtsýdan aýdandyq, respýblıkalyq, halyqaralyq týrnırler uıymdastyrdyq. Bunyń barlyǵy jastardyń sportqa degen qyzyǵýshylyǵyn arttyryp, aýyl sportynyń damýyna úlesin qosary sózsiz», - dedi Nursultan Orynbasarov.
Sonymen qatar, jas bapker óz komandasy jaıly sóz qozǵap, aldaǵy josparymen bólisti.
«Aldaǵy ýaqytta da komandammen kóptegen týrnır uıymdastyratyn bolamyz. Sonymen qatar aýylymyzdyń jastary sportqa úlken qyzyǵýshylyq tanytyp otyr. Soǵan baılanysty osy jyly, Túımebaev aýylynda 400-den asa sportshy jattyǵa alatyndaı úlken sport zalyn salýdy josparlap otyrmyz. «Saǵadat batyr» sport klýbynda jas bapkerler shákirtterin sportqa baýlı otyryp, boıyna patrıotızm sezimin darytýda. Bul klýb eki zalda jumys jasaıdy. Biri Іle aýdany Túımebaev aýylynda bolsa, ekinshisi Almaty qalasy, Qazaqfılm yqsham aýdanynda ornalasqan. Búginde klýbta 170-ten asa sportshy tárbıelenýde. Olardyń árqaısysynyń ózindik qulshynysy men ózindik erekshelikteri damyp keledi. Sporttyń ózi úshin de, eli úshin de qajet ekenin sezinip sheberlikterin arttyrýda komanda músheleri talmaı jattyǵý ústinde. Óskeleń urpaqty elin súıýge tárbıeleýde meniń komandamnyń qosar úlesi orasan bolmaq», - dedi ol.
Nursultan Orynbasarovtyń aıtýynsha, Qazaqstannyń bolashaǵy - búgingi jastar.
«Sondyqtan, bolashaq bulyńǵyr bolmaýy úshin jastarǵa kórsetilip otyrǵan búgingi qoldaý kóńilge úlken úmit uıalatady. Jastar jylynda qoǵam úshin paıdaly, aýqymdy ister atqarylady dep senemin», - dep túıdi ol.
Eske salaıyq, keshe, 23 qańtar kúni Astanada Nursultan Nazarbaevtyń qatysýymen Jastar jylynyń saltanatty ashylý rásimi ótti.
Sharaǵa Úkimet músheleri, QR Parlamenti depýtattary, jergilikti atqarýshy organ basshylary, QR Prezıdenti janyndaǵy Jastar saıasaty keńesiniń músheleri, «100 jańa esim» baıqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jıynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýı medıa salasynyń ókilderi, balalar úıiniń tárbıelenýshileri men túlekteri, jas áskerı qyzmetshiler kelgen.
Aıta ketsek, Prezıdent Qazaqstan halqyna ótken jylǵy Joldaýynda 2019 jyldy Jastar jyly dep jarııalaýdy usynǵan bolatyn. Arada bir aıdan astam ýaqyt ótkennen keıin Elbasy Jarlyǵymen 2019 jyl Jastar jyly bolyp resmı túrde jarııalandy.
Avtory Elaman Turysbekov