Jastardy áskerge qabyldaý salasynda paraqorlyq órship barady - senator
«Qazir qoǵamda jastarymyzdyń áskerı boryshyn óteýge, áskerge barýyna qatysty biraz másele bar. Endi biri áskerge baryp jatsa, endi biri áskerge barýdan qorqady. Biz óńirlerdegi birqatar jaǵdaıdy baıqap otyrmyz, ıaǵnı medıtsınalyq tekserý kezinde keıbir jastarymyz áskerden jaltarýǵa talpynady. Osy oraıda medkomıssııaǵa para usynyp, jaltaryp jatyr. Árıne, bir jaǵynan olardy da, ata-analaryn da túsinýge bolady. Qazirgi zamanda 18 jasqa deıin mápelep ósirgen balasyn aman-esen áskerge jiberip, odan keıin ony múgedek kúıinde nemese tabytpen qarsy alyp jatsa, kimge jaqsy ?! Meniń oıymsha, biz áskerdegi tártipsizdikti rettemeı, paraqorlyqty kóbeıtip jatyrmyz», - dedi G. Shıpovskıh Senatta áskerı qyzmetshilerdiń densaýlyǵyna qatysty máseleni talqalaý kezinde.
Óz kezeginde Bas áskerı prokýrordyń birinshi orynbasary Maqsat Qazıev áskerde komandırler jaqsy tárbıe berip, ózderin úlgi retinde kórsetýi ár sarbazǵa úlken qoldaý bolatynyn aıtty.
«Qorǵanys mınıstrligine toqtalsam, jyl saıyn komandır 720 qujat toltyrýy kerek. Osy oraıda sarbazdarǵa qarap, psıhologııalyq turǵyda nemese basshy retinde kómegin qalaı kórsetedi? Kúni boıy qaǵaz toltyrýmen júredi. Sondyqtan osy máseleni kóterdik. Qazirgi kezde vedomstvolar bul qujattardy azaıtyp, tek naqty qujattardy ǵana qaldyryp jatyr. Sonymen qatar basqa da josparlardy pysyqtap jatyrmyz», - dedi M. Qazıev.
Bul turǵyda senator Gennadıı Shıpovskıh áskerdegi kemshilikterdi joıý úshin qatań sheshimder bolýy kerek ekenin atap ótti.
«Eger óńirde osyndaı jaǵdaı bolsa, bir sarbaz mert bolsa nemese múgedek bolsa, dál sol jerdegi aımaqtyq bólimshelerdiń birinshi basshylaryn mindetti túrde qatań jaýapqa tartý kerek. Tipti, trıbýnalǵa jiberý kerek. Sonda ǵana tártip ornaıdy», - dedi depýtat.