Jastardy ádebıetke, óner men mádenıetke baýlýymyz kerek - B.Saparbaev

ASTANA. QazAqparat - Jastardy ádebıetke, óner men mádenıetke baýlýymyz kerek. Bul pikirdi búgin QR Mádenıet jáne sport mınıstrliginiń Elbasy N.Nazarbaevtyń «Nurly jol - bolashaqqa bastar jol» atty Joldaýyn júzege asyrý máselelerine arnalǵan keńeıtilgen alqa májilisinde QR Premer-Mınıstriniń orynbasary Berdibek Saparbaev bildirdi.

«Árbir ulttyń, memlekettiń damýy, bolashaǵy órkenıetke baılanysty. Sondyqtan Elbasy Nursultan Nazarbaev egemendik alǵan kúnnen bastap osy máselege zor kóńil bólip keledi. Jaqynda ǵana Memleket basshysynyń Jarlyǵymen mádenıettiń saıası damýynyń tujyrymdamasy qabyldandy. Mundaǵy negizgi maqsat - osy saladaǵy barlyq qyzmetkerlerdiń «Qazaqstan-2050» strategııasyn júzege asyrýǵa baılanysty jumystardy júrgizip, elimizdiń dúnıejúziniń damyǵan 30 eliniń qataryna kirýi úshin óz úlesterin qosýy», - dedi ol.

Sonymen qatar Úkimet basshysynyń orynbasary árbir memlekettiń damýy tek onyń ekonomıkalyq kórsetkishterimen emes, sonymen birge ádebı, mádenı, sporttyq kórsetkishterimen de eseptelinetindigin basa aıtty. Qazirgi qıynshylyqtarǵa qaramastan elimizde memlekettiń qoldaýymen júzdegen kitaptar jaryq kórip, romandardyń , pesalardyń jazylyp jatqanyn, fılmderdiń túsirilip jatqanyn atap ótti.

«Endigi maqsat - osynaý tujyrymdamaǵa sáıkes sol týyndylardy elge, ásirese, jastardyń arasynda nasıhattap, túsindirip, baǵasyn berý. Ókinishke oraı, qazirgi kezde bizdiń jastarymyz kitap oqýdan, kontsertke barýdan qalyp barady.

Sondyqtan jergilikti jerdegi basqarmalardyń, ákimshilikterdiń mindeti - jastardy ádebıetke, ónerge, mádenıetke baýlý», - dedi B.Saparbaev.