Jastar tárbıesine keri áser etetin teris ıdeologııadaǵy fılmder qaýipti - Rınat Zaıytov
«Osyndaı mazmundaǵy fılmderdi ıdeologııalyq qarý dep baǵalaýǵa bolady. Mundaı fılmder óskeleń urpaqqa óte qatty áser beredi. Óıtkeni balalardyń sanasy áli qorǵana qoımaǵan, osyndaı fılmderdegi kórinisterdiń bárin óz boıyna sińirip alady. Ekrannan ne kórse, soǵan qumar bolady. Mundaı mazmundaǵy fılmder men serıaldar keıingi jyldary elimizde de túsirilgen, sondaı-aq beımádenı sheteldik fılmder de barshylyq. 20 jyl buryn «Brıgada» degen serıal shyǵyp, onyń keıipkerleri jasóspirimderge qatty áser etkenin bilemiz. Jastar solardyń laqap atyn qoıyp alyp, eliktep júrdi. Sondyqtan bul jaǵdaıdy qaýipti dep sanaımyn», - dedi R. Zaıytov.
Bul turǵyda depýtat elimizde osyndaı jaǵdaılardyń aldyn alyp, ıdeologııalyq jaǵynan jaqsy serıaldar men fılmderdiń sanyn kóbeıtý mańyzdy ekenin aıtty.
«Mınıstrliktiń bul baǵytta monıtorıng júrgizetindeı shamasy bar. Urpaqqa, ultqa zııany tıetin, jastardyń bilim alýyna bóget jasaıtyn teris ıdeologııaǵa qarsy turyp, osy máselelerge erekshe mán berýimiz kerek», - dedi depýtat.
Eske salsaq, jaqynda QR Іshki ister mınıstrligi ákimshilik polıtsııa komıteti tóraǵasynyń orynbasary Renat Zulqaıyrov balalar men jasóspirimder tárbıesine keri áser etip jatqan fılmder men serıaldardy atap shyqqan edi.
«Balalar táýlik boıy ınternetti, áleýmettik jelilerdi qarap otyrady. Munda eń tanymal kontent retinde birinshi orynǵa zorlyq-zombylyq, dórekilik pen túrli prankter shyǵyp otyr. Sonymen qatar, keıingi kezderi kámeletke tolmaǵandardyń minez-qulqyna «Chernyı dvor», «Patsanskaıa ıstorııa», «Taraz», «Slovo patsana» sııaqty tanymal fılmder keri áser etip jatyr», - dedi R. Zulqaıyrov.