Jastar jyly: Tarazda jańa alleıa ashylady
Qazirgi tańda Súleımenov kóshesiniń boıyndaǵy «Atshabar» alleıasyn abattandyrý jumystary qyzý júrip jatyr. Bul joba oblystyq qala qurylysy keńesinde jarty jyl qarastyrylyp, barlyq máseleler anyqtalǵan bolatyn.
«Búginde nysannyń qurylys jumystaryna «AraıStroıMarket-2003» men «Tabys joba» jaýapkershiligi shekteýli seriktestikteri «Týǵan jer» baǵdarlamasy aıasynda óz úlesterin qosýda. Oblys basshysy Asqar Myrzaxmetovtyń bastamasymen alleıanyń ataýyn «Jastar alleıasy» etip ózgertý týraly usynys qoldaý tapty. Bul óz kezeginde, Jastar jylyna arnalǵan eleýli oqıǵa dep esepteımiz», - dedi shahar basshysy Ǵalymjan Ábdiraıymov.
Aıta keteıik, atalǵan alleıada «Bilim», «Qarahan - Aısha bıbi» stellalary jáne zamanaýı sýburqaqtar ornatylady. Sondaı-aq, alleıanyń ortańǵy bóliginde jastar úshin ǵalamtor jelisine úzdiksiz qosylýǵa múmkindik beretin ınternet-kafe boı kóterse, alleıaǵa kólemi 6,7h6,7 metrlik LED-ekran qoıylyp, jaz mezgilinde kontsertter men kıno kórsetiletin bolady.