Jastar jyly: Stýdentterdiń áleýmettik jaǵdaıy jaqsarady

ASTANA. QazAqparat - Jastar jyly aıasynda Prezıdenttiń bastamalary stýdentterdiń áleýmettik ál-aýqatyn jaqsartýǵa múmkindik beredi. Bul týraly QR Prezıdentiniń janyndaǵy QSZI bóliminiń aǵa ǵylymı qyzmetkeri Janar Sanhaeva aıtty, dep habarlaıdy QazAqparat.

«Memleket basshysy Jastar jylynyń resmı ashylýynda Qazaqstan jastarynyń ómiriniń ártúrli aspektilerine qatysty birqatar tapsyrmalar berdi. Osy oraıda endi joǵary bilimge qoljetimdilikti keńeıtý máselelerine erekshe nazar aýdarylady. Bul máseleniń ózektiligi statıstıkalyq derektermen de kórsetiledi. Qazaqstan 2016 jyly 10 myń adamǵa shaqqanda joǵary bilim berý júıesinde oqıtyn stýdentter sany boıynsha TMD elderiniń arasynda 6-shy oryndy ıelendi. Osylaısha, Qazaqstanda sol ýaqytta 10 myń adamǵa 266 stýdentti qamtydy, al reıtıngtiń kóshbasshysy retinde Belarýs 330 stýdent kórsetkishimen shyqty», - dedi J. Sanhaeva.

Sarapshynyń atap ótýinshe, jastarmen kezdesý kezinde Prezıdent joǵary bilimniń qoljetimdiligin jaqsartý boıynsha Qazaqstan óz maqsattaryn júzege asyrýdy jalǵastyryp kele jatqanyn taǵy da baıqatty. Buǵan deıin aqysyz bilim alý úshin 20 myń grant bólý bastamasy jarııalanǵany belgili. Endi osy baǵyttaǵy tyń tapsyrmalar bilim berý deńgeıin kóterýdiń basqa joldaryn izdestirýdi jáne stýdentterdiń áleýmettik ál-aýqatyn jaqsartýǵa negiz bolmaq.

«Bilimge qol jetimdilikti keńeıtý eńbek naryǵyn bilikti mamandarmen qamtamasyz etý turǵysynan, sondaı-aq jastar úshin «áleýmettik lıft» retinde mańyzdy ekenin atap ótý kerek. Osylaısha, joǵary bilim berý júıesi aıasynda kásibı daǵdylardy ıemdenýmen qatar, ózge de birqatar jeńildikterge qol jetkizemiz. Memleket basshysy áleýmettik belsendi jas azamattardy yntalandyrýdyń mańyzdylyǵyn atap ótti, onyń ishinde volonterlikpen aınalysýdy qalaıtyndardy materıaldyq túrde qoldaýǵa qatysty tapsyrma berildi. Mundaı tájirıbe stýdentke óz ustanymyn jetildirip, basqa adamdarǵa kómektesýge daıyn áleýmettik jaýapty azamatty tárbıeleýge múmkindik beredi», - dedi Janar Sanhaeva.

Budan buryn habarlanǵandaı, Memleket basshysy Nursultan Nazarbaev Úkimetke volonterlikpen aınalysatyn JOO stýdentteriniń shákirtaqysyn 30 paıyzǵa arttyrýdy tapsyrdy.

Sonymen qatar, Prezıdent «Jas maman» baǵdarlamasyn ázirleýdi júktedi.

Munymen qosa, «Dıplommen aýylǵa» baǵdarlamasyn damytýǵa qatysty tapsyrmalar berildi.

Foto: www.kisi.kz