Jastar jyly: stýdent-eriktilerdiń shákirtaqysyna 30 paıyz aqsha qosylady
Soltústik Qazaqstan oblysynda Jastar jylyna arnalǵan is-sharalardyń jospary qurylyp, stýdenttermen kezdesý ótti. «Jas Otan» JQ men oblystyq jastar saıasaty máseleleri jónindegi basqarma uıymdastyrǵan sharaǵa qalalyq máslıhat depýtattary, Petropavldaǵy jastar uıymdarynyń ókilderi qatysty.
«Elbasy tapsyrmasy boıynsha erikti bolyp júrgen stýdentterdiń shákirtaqysyna 30 paıyz aqsha qosylady. Sondaı-aq biz eriktiler mektebin ashamyz. Mektep, jalpy burynnan bar, biraq esh jerde tirkelmegen bolatyn. Endi árbir stýdent eriktiniń kýáligin alyp, sol qujat arqyly oqý ornynda erikti ekenin dáleldep, joǵary shákirtaqy alady», - deıdi «Jas Otan» JQ SQOF jetekshisi Abylaıhan Qaırollaev.
Elbasy tapsyrmasy boıynsha Jastar jylynda jastarǵa qoldaý kóbeıedi. Al, óz kásibin ashyp, bıznespen aınalysamyn degenderge elimizde qashanda jol ashyq. Oǵan kóz jetkizgenderdiń biri - Petropavl qalasynyń turǵyny Sálimhan Sábıtov. Sálimhan - Sh.Shaqshaqbaev atyndaǵy qımyl-tirek apparaty zaqymdanǵan balalarǵa arnalǵan TMD-daǵy alǵashqy ınklıýzıvti mektep-ınternatynyń túlegi. Ekinshi top múgedektigi bolǵanyna qaramastan ol jaqynda Qazaqstan boıynsha teńdesi joq avtomektep ashty.
«Men múgedek balalarǵa arnalǵan avtomektep ashqanyma óte qýanyshtymyn, sebebi ol tek óz armanym emes, ózim sııaqty basqa da balalardyń armanyn júzege asyryp, olarǵa múmkindik berip, olar da qoǵamǵa óz úlesin qossyn degen oı. Bul jobanyń Qazaqstan boıynsha analogy joq, búgingi kúnde eki avtokólik bar, 13 adam oqyǵysy kelip jatyr, osy aqpan aıynda avtomektep ashylady», - deıdi múmkindigi shekteýli jandarǵa arnalǵan «Teń jol» avtomektebiniń negizin qalaýshy kásipker Sálimhan Sábıtov.
Petropavlda aqpan aıynda oblystyq Jastar forýmy ótip, naýryz aıynda eriktiler mektebi ashylmaq.