Jastar jyly: Sportta arýlardyń sany artyp keledi - Mahabbat Bolshına
«Sońǵy jyldary elimizde sport salasyna jiti kóńil bólinýiniń arqasynda arýlarymyzdyń arasynda sportshylar kóbeıe tústi. Qazaq qyzdarynyń sportpen dostasqanyn qalaımyn. Árıne, tańdaǵan sporty tap ózindeı «ádemi» bolsa... Elbasy aıtqandaı, búgingi kúni qyzdarymyz ózin-ózi qorǵaýǵa daıyn bolýy kerek. Ol úshin ərıne, sportpen shuǵyldanǵan mańyzdy», - deıdi M.Bolshına.
Búgin Astanada Elbasy Nursultan Nazarbaevtyń qatysýymen ótken Jastar jylynyń saltanatty ashylý rásiminde djıý-djıtsýden álem chempıony Móldir Mekenbaeva sport salasyndaǵy tájirıbesi jáne osy salada atqaryp jatqan jumystary týraly baıandaǵan bolatyn. Elbasy jas sportshynyń sózin tyńdaı kele, «Qyzdardy ózin-ózi qorǵaı bilýge úıretken asa mańyzdy», dep atap ótken edi.
Sondaı-aq basqarma mamany aýyl jastarynyń sportpen aınalysýyna jaǵdaı jasaýǵa qatysty pikirimen bólisti.
«Aqmola oblysynyń sport qaýymdastyǵynyń múshesi retinde elimizdiń kez kelgen sporttyq jeńisterine erekshe qýanamyn. Elimizdiń ekonomıkasymen birge sport ta damýda. Bizdiń oblysta da Temirtas Júsip, Dına Jolaman, Móldir Bazarbaeva sııaqty kóptegen ataqty jas sportshylar bar. Biz olarmen maqtanamyz. Ásirese, memleket tarapynan sportqa degen qoldaý joǵary deńgeıde. Memleket basshysynyń «Týǵan jer» kishi baǵdarlamasy sheńberinde de jergilikti kásipkerlerdiń qoldaýynyń arqasynda aýyldyq eldimekenderde sport nysandary kóptep salynýda. Barlyǵymyz aýyldan shyqqanbyz. Sondyqtan, aýyldyq jerlerdegi jastardyń dene shynyqtyrý jáne sportpen shuǵyldanýyna jaǵdaı jasaý mańyzdy dep esepteımin», - deıdi ol.
Onyń aıtýynsha, kóptegen aýyldarda áli kúnge deıin sporttyq úıirmeler jetispeıdi.
«Bolǵannyń ózinde tolyqqandy sportpen aınalysýǵa múmkindik joq. Bıylǵy Jastar jyly osy másele oń sheshimin tabady dep senemin. Jalpy, aýyl jastarynyń sportpen aınalysýyna jaǵdaı jasalynyp jatqandyǵy bizderdi qýantady», - dedi Mahabbat Bolshına.