Jastar jyly: Beıjińde eńbektegen sábıler qatysqan jarys ótti

BEIJІŃ. QazAqparat - Beıjińde Qazaqstandaǵy Jastar jyly aıasynda jeńil atletıkadan jarystar ótti, dep habarlaıdy «QazAqparat» HAA menshikti tilshisi.

Іs-sharaǵa qazaqstandyq dıplomattar, ulttyq kompanııalardyń ókilderi men olardyń otbasylary - eńbektegen sábıler men mektep jasyna deıingi balalar, oqýshylar men stýdentter qatysty.

Jarys 1 jasqa deıingi nárestelerdiń 10 metr qashyqtyqty eńbektep eńserýinen bastaldy. Keıin 1-2 jas, 3-4 jas, 5 jas, 6-7 jas, 8-9 jas, 10-11 jas, 12 jáne odan joǵary jastaǵy balalar baq synady.

Doda jeńimpazdary men júldegerleri Qazaqstannyń Qytaıdaǵy Elshisi Shahrat Nuryshevtiń atynan alǵys hattar men syılyqtar aldy.

«Eń kishkentaı sábılerdiń qatysýymen jarys bıyl ekinshi ret ótip otyr. Bul jaqsy dástúrge aınalyp keledi. Balalar oǵan tynymsyz daıyndalyp, bastalýyn kútedi. Mundaı sporttyq sharalar ujymnyń birligin nyǵaıtady, salaýatty ómir saltyna bala kezden baýlyp, patrıottyq sezimdi arttyrady», - dedi «QazAqparat» HAA tilshisine QR-dyń QHR-daǵy elshiliginiń keńesshisi Asan Álibaev.

Avtory Sadyq Ákejanov