Jastar jyly: Aýyl sharýashylyǵy salasyn damytqym keledi - stýdent

ORAL. QazAqparat -Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń 3-kýrs stýdenti Azamat Qultaev bolashaq maman retinde aýyl sharýashylyǵy salasyn damytqysy keletinin aıtty, dep habarlaıdy QazAqparat tilshisi.

Búgin Astanada Elbasy Nursultan Nazarbaevtyń qatysýymen ótken Jastar jylynyń saltanatty ashylý rásimin atalmysh ýnıversıtet stýdentteri de (barlyǵy 2500-den astam adam) tikeleı efırden tamashalady.

Solardyń biri, veterınarlyq medıtsına jáne bıotehnologııa fakýltetinde bilim alyp jatqan A.Qultaevtyń aıtýynsha, Memleket basshysy ózekti máselelerdi qozǵaı otyryp, jastardy aýyl sharýashylyǵymen aınalysýǵa qyzyqtyra bilýdiń qajettigin atap kórsetti.

«Shyndyǵynda da jastardyń aýylǵa bet burýy qazirgi kezde óte mańyzdy. Mysaly, men ózim arqar-merınos qoıyn ósirý jáne olardy kóbeıtý jumystaryn qolǵa alar edim. Armandardyń oryndalýy úshin aldyńa bıik maqsat qoıa bilý kerek. Sonyń biri - magıstratýraǵa túsý. Eń bastysy, keleshekte aýyl sharýashylyǵyn damytý arqyly elimizdi odan ári gúldendirýge óz úlesimdi qosqym keledi», - dedi Azamat Qultaev.

Osy fakýltettiń 2-kýrs stýdenti Gúlbaǵdat Jamalova da óz pikirin bylaısha bildirdi. «Saltanatty jıyn barysynda elimizdiń jastary ózderi júzege asyrǵan tabysty jobalaryn tanystyrdy. Jastar jylynda memlekettik jastar saıasatyn jan-jaqty qoldaý men júzege asyrýǵa baǵyttalǵan ister júzege asady degen úmittemin. Prezıdent jastardyń barlyq sanatyn qoldaýǵa arnalǵan jobalar men áleýmettik satynyń aýqymdy platformasyn qalyptastyrý keregin atap ótti. Bilim men ǵylymǵa kóńil bólinip, granttar sanynyń artatyny da aıtyldy. Bul - stýdentter úshin qýanyshty jaǵdaı», - dedi ol.

«Bıylǵy jyldyń jastarǵa bereri mol bolmaq. Turǵyn úı, jumyspen qamtý, bilim sekildi Elbasy toqtalǵan taqyryptar kóńilimizden shyǵyp, memleket tarapynan qoldaýdyń bar ekenin sezindik. Osynyń nátıjesinde biz, jastar, aldaǵy ýaqytta aıqyn maqsatpen memleket úshin eńbek etýge daıynbyz. Ásirese, bir mınýttyń ishinde 1200 oqýlyqty kırıll jazýynan latyn grafıkasyna aýdara alatyn baǵdarlama jasaǵan jas órenderdiń baryna qýandyq. Osyndaı daryndy jastardyń elimizdiń ár óńirinen shyǵatynyna senimdimiz», - dedi mashına jasaý fakýltetiniń 4-kýrs stýdenti Naýryzbek Turlybekov.

Eske sala keteıik, budan buryn osy ýnıversıtette stýdentter ortalyǵynda 35 qyzmet túriniń kórsetiletinin jazǵan bolatynbyz.