Jastar saıasatynyń mańyzdy baǵyttarynda 6 komıtet quryldy

NUR-SULTAN. QazAqparat – Qazaqstanda jastar saıasatyna qatysty máselelermen aınalysatyn 6 komıtet paıda boldy. Bul týraly QR Memlekettik hatshysy Erlan Qarın málim etti, dep habarlaıdy QazAqparat tilshisi.

«Búgin jastar saıasaty jónindegi keńestiń elordalyq múshelerimen kezdestim. Sondaı-aq, zoom arqyly shetelde turyp jatqan áriptestermen áńgimelesip, ózekti máselelerdi talqyladyq. Keńestiń jańa quramy jýyrda jasaqtalǵanyna qaramastan, biraz jumysqa kirisip kettik. Jumysty tıimdi uıymdastyrý úshin biz jastar saıasaty salasynyń mańyzdy baǵyttary boıynsha 6 komıtet qurdyq. Atap aıtqanda, bilim berý jáne ǵylym, medıa, kreatıvtilik jáne óner, ekologııa, múmkindigi shekteýli jastar, gender máseleleri, turǵyn úı, jumyspen qamtý taǵy basqa», - dep jazdy Erlan Qarın áleýmettik jelidegi paraqshasynda .

Memlekettik hatshynyń aıtýynsha, sáýir-maýsym aılarynda atalǵan komıtet músheleri memlekettik organ basshylarymen kezdesý ótkizýdi josparlap otyr.

«Keńes músheleri zań shyǵarý jumysyna atsalysa bastady. Keńestiń 15 múshesi «Memlekettik jastar saıasaty týraly» zań jobasy boıynsha qurylǵan jumys tobynyń quramyna kirdi. Sondaı-aq, Keńes músheleri volonterlik qyzmet, qaıyrymdylyq, úkimettik emes uıymdarǵa arnalǵan memlekettik áleýmettik tapsyrystar jáne granttar týraly zań jobalary boıynsha jumys toptaryna qatysady», - deıdi ol.

Sondaı-aq, Erlan Qarın keńes músheleri kıberbýllıng týraly zań jobasynyń qoǵamda qyzý pikirtalas týdyrǵan normalardy pysyqtap, ózgertýge atsalysqanyn aıtty.

«Keńestiń aldaǵy jumysy da óte qaýyrt. Onyń múshelerin jastarǵa qatysty mańyzdy baǵdarlamalyq qujattardy ázirleýge jumyldyrý josparlanyp otyr», - dedi E. Qarın.

Aıta keteıik, Prezıdent janyndaǵy jastar saıasaty keńesiniń jańa quramdaǵy alǵashqy jıyny Almatyda ótken bolatyn.