Jastar saıasaty jónindegi keńes jumysyn qaıta jasaqtaý mindeti tur – mınıstrlik

NUR-SULTAN. QazAqparat – Elimizde jastar resýrstyq ortalyqtarynyń qurylymyn jańartyp, qaıta iske qosý ózekti máselelerdiń biri bolyp otyr. Bul týraly QR Aqparat jáne qoǵamdyq damý vıtse-mınıstri Aleksandr Danılov málim etti, dep habarlaıdy QazAqparat tilshisi.

«Biz qazir jastarmen ózara is-qımyldyń barlyq tásilderin baıypty túrde qaıta qaraýdamyz. Jastar ózine ne qajet ekenin naqty anyqtaǵanyn qalaımyz. Biz kózqarasty ózgertemiz. Endi jastar sýbekt emes, jumys obektisi bolady. Shynymen de jastarmen ózara is-qımyl jasaýǵa baǵyttalǵan barlyq baǵdarlamalarǵa jańa baǵa berip, olardy qalaı jaqsartýǵa bolatynyn túsinýimiz kerek. Muny jastardyń belsendi qatysýynsyz jasaý múmkin emes. Biz úshin eń ózekti máselelerdiń biri – jastar resýrstyq ortalyqtarynyń qurylymyn jańartý jáne qaıta iske qosý. Resýrstyq ortalyqtardy jastar úshin tıimdi etkimiz keledi», - dedi Aleksandar Danılov elordada ótip jatqan Azııadaǵy ózara is-qımyl jáne senim sharalary keńesi jastar keńesi barysynda.

Sondaı-aq, vıtse-mınıstr jastar saıasaty keńesiniń jumysyn da qaıta qaraý kerektigin aıtty.

«Aýqymdy mindetterimizdiń biri ákimdikter janyndaǵy jastar saıasaty jónindegi keńesterdi qaıta jasaqtaý. Biz formalızmdi qoıyp, máselelerdi problemalyq talqylaýǵa júginip, shyndyqty ózgertýge daıyn jastardy tartqymyz keledi. Qazir Prezıdent janyndaǵy qaıta iske qosylǵan jastar saıasaty jónindegi keńespen tyǵyz baılanystamyz. Biz ózgerister kútemiz. Prezıdenttik jastar kadrlyq rezerviniń tájirıbesimen bóliskimiz keledi. Biz jastar ósip, ózderin damyta túsý úshin taǵy qandaı múmkindikterdiń baryn qarastyrmaqpyz», - deıdi ol.

Aıta keteıik, Nur-Sultan qalasynda Azııadaǵy ózara is-qımyl jáne senim sharalary keńesi jastar keńesiniń besinshi otyrysy ótip jatyr.