Jastar saıasaty jónindegi keńes jańartylǵan quramda iske kiristi

ASTANA. QazAqparat - QR Prezıdenti janyndaǵy jastar saıasaty jónindegi keńestiń jańartylǵan quramy alǵashqy otyrysyn ótkizdi. Jıynǵa QR Memlekettik xatshysy Gúlshara Ábdiqalyqova tóraǵalyq etti, dep xabarlaıdy QazAqparat tilshisi.

Aıta ketken jón, atalǵan keńes 2008 jyly qurylǵan bolatyn. Sodan beri keńes músheleri 19 ret jınaldy. 10 otyrys aımaqtarda ótti. Sol kezde bilim berý, mádenıet, jumyspen qamtý, turǵyn úı, densaýlyq saqtaý, dene shynyqtyrýdy damytý jáne taǵy basqa máseleler kóterildi.

Jalpy, osy ýaqytqa deıin qolǵa alynǵan sharalardyń nátıjesinde jastar saıasaty boıynsha biryńǵaı memlekettik vertıkal qalyptasty. QR Din isteri jáne azamattyq qoǵam mınıstrliginde jastar saıasaty boıynsha arnaıy departament quryldy. Jergilikti jerlerde jastar saıasaty basqarmalary men arnaıy keńester jumys istep keledi. 2013 jyldan beri memlekettik jastar saıasatyna arnalǵan tujyrymdama qolǵa alyndy. Byltyr atalǵan qujattyń ekinshi kezeńi bastaldy. «Memlekettik jastar saıasaty týraly» Zań da bar. Jastarmen jumys júrgizýge bólinetin qarjy jyldan jylǵa ulǵaıyp keledi. Sońǵy úsh jyldyń ishinde respýblıkalyq deńgeıde 2 mlrd teńge, al jergilikti deńgeıde 17,5 mlrd teńge bólindi. «Dıplommen aýylǵa», «Jasyl el», «Jastar praktıkasy», «Jastardyń kadrlyq rezervi», «Máńgilik el jastary» jáne taǵy basqa bastamalar iske asyp jatyr. Ótken jyldyń qorytyndysy boıynsha jastardyń álemdik ındeksinde Qazaqstan 183 eldiń ishinde 61-shi orynnan kórindi.

Aǵymdaǵy jyldyń qazan aıynda Prezıdent Jarlyǵymen keńestiń jańartylǵan quramy bekitilgen bolatyn.