Jastar saıasaty salasynda qandaı ustanymdarǵa basymdyq berilgen
«Memlekettik jastar saıasatynda myna ustanymdarǵa ekpin qoıylǵan: mádenı ári adamgershilik jáne rýhanı qundylyqtardyń basymdyǵy; azamattyq, jaýapkershilik, eńbekqorlyq; konfessııaaralyq kelisim men ultaralyq toleranttylyq; urpaqtar sabaqtastyǵy, otbasy tárbıesiniń basymdyǵy. Memlekettik otbasy saıasatynyń maqsaty - otbasyn qoldaý, nyǵaıtý jáne qorǵaý. Sonymen qatar, otbasy men músheleriniń fızıkalyq, ıntellektýaldyq, rýhanı, adamgershilik turǵyda damýyna qajet jaǵdaı jasaýǵa erekshe nazar aýdaralyp otyr», - delingen mınıstrliktiń Kazinform agenttiginiń saýalyna bergen jaýabynda.
Qazaqstanda mádenı qundylyqtardy, dástúrdi, rýhanııatty saqtaý, óskeleń urpaqty tárbıeleý jáne otbasy mártebesin nyǵaıtý jónindegi ulttyq memlekettik mindetti júzege asyrý maqsatynda Otbasy kúni belgilendi.
2014 jyldan beri adamgershilik qundylyqtardy jańǵyrtýǵa jáne otbasy men nekeniń oń ımıdjin nasıhattaýǵa, otbasynyń mártebesin kóterýge baǵyttalǵan «Mereıli otbasy» ulttyq baıqaýy jyl saıyn ótkizilip keledi. Osy jyldar ishinde baıqaýǵa Qazaqstannyń barlyq aımaǵynan 20 myńnan astam otbasy qatysty.
Azamattyq qoǵam uıymdarymen birlese otyryp, jyl saıyn otbasy saıasaty salasynda 100-den astam áleýmettik joba júzege asyrylady. Otbasy saıasaty salasyndaǵy ýákiletti organ belgilendi.
2023 jyly Qazaqstan Respýblıkasyndaǵy mereke kúnderiniń tizbesi «Analar kúni» (mamyrdyń ekinshi jeksenbisi) jáne «Ákeler kúni» (maýsymnyń úshinshi jeksenbisi) datasymen tolyqtyryldy. Bul turǵyda, mınıstrlik mádenı qundylyqtardy, salt-dástúrdi, rýhanııatty saqtaý, óskeleń urpaqty tárbıeleý jáne otbasy mártebesin nyǵaıtý baǵytynda jumystardy atqaryp keledi.