Jastar praktıkasy: Shymkentte 2,5 myńnan astam jas jumysqa ornalasty
Memleket basshysy Qasym-Jomart Toqaevtyń tapsyrmasyna sáıkes, jastar arasyndaǵy jumyssyzdyq deńgeıin tómendetý maqsatynda bıyl «Jastar praktıkasy» baǵdarlamasynyń merzimin 12 aıǵa, al jalaqysyn 30 AEK-deıin kóterý josparlanǵan bolatyn. Osyǵan oraı Shymkentte 2,5 myńnan astam jas atalǵan baǵdarlamaǵa qatysyp, nátıjesinde 1283-si qaladaǵy túrli mekemeler men kásiporyndarda turaqty jumysqa ornalasqan.
Solardyń biri – Nazerke Taǵaeva. M.Áýezov atyndaǵy Ońtústik Qazaqstan memlekettik ýnıversıtetinde «quqyqtaný» mamandyǵyn meńgergen ol, QR Memlekettik qyzmet isteri agenttiginiń Shymkent qalasy boıynsha departamentine 6 aı merzim boıynsha jastar tájirıbesine joldandy. Ózin tájirıbeli jas maman retinde kórsetip, keıinen departament tarapynan QR Strategııalyq josparlaý jáne reformalar agenttigi Ulttyq statıstıka bıýrosynyń Shymkent qalasy boıynsha departamentine turaqty jumysqa ornalasty.
«Memlekettik baǵdarlamanyń tıimdiligin kórip otyrmyn. Jastarǵa ýaqytsha jumystan turaqty jumysqa ornalasýǵa múmkindik bar ekendigin aıta alamyn. Búginde men Shymkent qalasynyń Statıstıka departamentinde zań bóliminde jetekshi maman retinde qyzmet atqaramyn», - deıdi Nazerke Nurlanqyzy.
Atalǵan departamentte dál osylaı memlekettik baǵdarlamanyń arqasynda turaqty jumysqa ornalasqan jastardyń biri –Erjan Beksultan. M.Saparbaev atyndaǵy Ońtústik Qazaqstan Gýmanıtarlyq ınstıtýtynda «ekonomıst» mamandyǵyn meńgergen ol, Statıstıka departamentinde jastar praktıkasynan ótip, keıinen tájirıbeden soń sol mekemede turaqty jumysqa ornalasqan. Qazirgi tańda personaldy basqarý bóliminde bas maman qyzmetin atqaryp júr.