Jastar Otan aldyndaǵy áskerı boryshyn óteýge attandy - Qyzylorda

QYZYLORDA. QazAqparat - Qyzylorda oblysy Josaly kentiniń ortalyǵynda ornalasqan «Jastar saıabaǵynda» jyldaǵy dástúr boıynsha Otan aldyndaǵy azamattyq boryshyn óteýge attanyp bara jatqan bolashaq sarbazdardy áskerge shyǵaryp salý saltanaty ótti, dep habarlady QazAqparat tilshisi Qarmaqshy aýdandyq ákimdigine silteme jasap.

 Saltanatty sharaǵa aýdan ákiminiń orynbasary Bolat Nurjigituly qatysyp, bolashaq sarbazdarǵa sát sapar tiledi. Sondaı-aq, aýdandyq ardagerler keńesiniń tóraǵasy Qarshyǵa Esdáýletov ulan-baıtaq qazaq dalasyn «naızanyń ushymen, bilektiń kúshimen» qorǵaǵan ata-babalarymyz saqtap kelgen el men jerdiń baıandy bolashaǵy men kemel keleshegi jastardyń qolynda ekendigin aıtyp, abyroımen oralyńdar, dep batasyn berdi. Shara barysynda jastar birlestikteriniń belsendileri aýdan jastarynyń atynan bolashaq sarbazdarǵa «Amanat hat» pen sarbazdyń kúndelikti tutynatyn zattaryn tabystady.

Aıta keteıik, bıyl aýdandyq áskerı bólim janynan jańadan áskerge shaqyrý pýnkti ashylyp, kúrdeli jóndeýden ótken bolatyn. Ótken jyly 95 qarmaqshylyq Otan aldyndaǵy áskerı boryshyn óteýge attanǵan bolsa, 31 azamat kelisimshart negizinde eńbek etýge nıet bildirgen. Al, búgingi kúnge 49 jas áskerge attanyp, 7 azamat kelisimshart negizinde qyzmet atqarýda.