«Jastar korpýsyn damytý» jobasy iske qosyldy

ASTANA. QazAqparat - Elimizde Halyqaralyq qaıta qurý jáne damý banki men Qazaqstan Respýblıkasynyń Bilim jáne ǵylym mınıstrligi birlesip iske qosqan «Jastar korpýsyn damytý» jobasy qolǵa alyndy. Búgingi tańda atalǵan joba aıasynda elimizdiń jastary úshin granttyq baǵdarlama bastalǵaly otyr. Ony, uıymdastyrýshylardyń aıtýynsha, Úılestirý agenttigi iske asyrady.

«Jastar korpýsyn damytý» jobasy - bul kúrdeli jáne kóp qyrly joba. Onyń negizgi maqsaty - jastardy, ásirese jastardyń osal toptaryn qoǵamdastyq ómirine tartý jáne qoǵamdyq paıdaly qyzmet daǵdylaryna oqytý. Sol  baǵdarlama arqyly olardyń ómirlik mańyzy bar daǵdylaryn qalyptastyrý jáne damytý.

Joba 2017 jyly pılottyq túrde iske qosylyp otyr. Sonyń nátıjesinde joba Qazaqstannyń tórt aımaǵyn, ıaǵnı Almaty, Ońtústik Qazaqstan, Qaraǵandy jáne Pavlodar oblystaryn qamtıdy dep josparlanýda. Pılottyq rejımde iske asatyn  2017 jyly bul sharaǵa shamamen 3 000 adam qatysady dep kútilýde.

Uıymdastyrýshylar sózine súıinsek, jobanyń erekshe basymdyǵynda - oqymaıtyn jáne jumys istemeıtin jastar. Onyń ishinde  kásiptik qaıta daıarlaýǵa tartylmaǵan jastar nemese jumys isteıtin, biraq kedeılik sheginen tys qalyp otyrǵan jas azamattar.

Esterińizge sala keteıik, «Jastar korpýsyn damytý» jobasy negizgi tórt komponentten turady:

- jastar toptaryna áleýmettik mańyzy bar kishi jobalardy júzege asyrý úshin olarǵa granttar men áleýmettik shákirtaqylar berý;

 - jas adamdardy ómirlik mańyzy bar daǵdylardy qalyptastyrý, damytý jáne jobalardy basqarý boıynsha oqytý;

- jastardyń osal toptarymen josparly túrde jumys isteý;

- tıimdi aqparattyq-túsindirý naýqanyn jáne keri baılanys pen máselelerdi sheshý tetigin iske asyrý.

«Jastar korpýsyn damytý» jobasyna elimizdiń 18-den 29 jasqa deıingi barlyq azamattary qatysa alady. Deı tura, erekshe basymdylyq jastardyń osal toptaryna jasalyp otyrǵandyǵyn eskerte keteıik. Joba aıasyndaǵy «Ómirlik mańyzy bar daǵdylardy damytý» baǵdarlamasy 6 aı aralyǵyndaǵy ýaqytqa josparlanyp otyr.  Oǵan: joba benefıtsıarlary úshin bastapqy alty kúndik trenıng, kishi jobalardy iske asyrýdyń josparlary men bıýdjetiń jetildirý, kishi jobalardy bes aılyq tájirıbelik iske asyrý, qorytyndy alty kúndik trenıng, benefıtsıarlardyń kishi jobalardy oryndaý týraly baǵdarlamalyq jáne qarjy esepterin tapsyrýy kiredi.

Atalǵan baǵdarlama jastarda ómirlik mańyzy bar daǵdylardy damytýdy, sonymen qosa olardyń áleýmettik jobalaryn iske asyrý múmkindigin boljamdaıdy.

Konkýrstyń sheńberinde qatysýshy retinde ótinim berý úshin - 3-5 adamnan toptarǵa birigip (qatysýshylardyń jasy 18-den 29-ǵa deıin), óz áleýmettik ıdeıasyn zhasproject.kz saıtynda ótinim nysanynda baıandaý qajet. Ótinimdi óz betterimen nemese saıttan qabyldaýshy uıymdy tańdaý arqyly usynýǵa bolady. Granttyń eń kóp somasy 1 000 000 teńgeni quraıdy, áleýmettik jobany iske asyrý kezeńi - 5 aı. Sonymen qosa, qatysýshylar úshin shákirtaqylar qarastyrylǵan: 26 000 teńge - mektep túlekteri men stýdentter úshin, 61 000 teńge - joǵary oqý oryndary men kolledjderdiń túlekteri úshin.

Sondaı-aq, baǵdarlama sheńberinde tórt pılottyq oblystyń turǵyndary ishinen mentorlardy irikteý ótýde. Mentor retinde 21 jastan asqan, áleýmettik jobalardy iske asyrý tájirıbesi jáne jastarmen jumys tájirıbesi bar adamdar bola alady. Ótinimdi zhasproject.kz saıtynda usynýǵa bolady.