Jastar Qasym-Jomart Toqaevty jaqsy kóredi – Prezıdentti anıme stılinde salǵan jas sýretshi
Arýjan - 22 jasta. Búginde ol Eýrazııa ulttyq ýnıversıtetinde «sáýlet dızaıny» mamandyǵy boıynsha bilim alyp jatyr.
«Men bul mamandyqty tańdaǵan kezde sýretshi nemese anımatorǵa qaraǵanda jaýapty is dep oıladym. Qazir «Tasqyn» anımatsııalyq stýdııasynda jumys isteımin. Bos ýaqytymda manga (japon komıkstary) oqyǵandy, ıogamen aınalysqandy, dostarymmen kezdeskendi unatamyn», - deıdi Arýjan Unarbekova.
Ol bala kezinen sýret salǵandy jaqsy kóredi. Keıin osy salada óz sheberligin ushtap, damytýǵa ne túrtki bolǵanyn áńgimelep berdi.
«Ata-anammen birge jıi kóship júrgendikten, maǵan mektepte beıimdelý qıyndaý boldy. Sabaqta artqy partada otyryp, sýret salatyn oqýshynyń biri men bolatynmyn. Degenmen sabaqty úzdik oqydym. Men sýretterdi kóbine iPad-qa salamyn. Sonymen qatar, qylqalam jáne dástúrli tásil sanalatyn qaryndashpen de sýret sala beremin. Synyptastaryma meniń salǵandarym unaıtyn. Bul meni odan ári jetile berýge yntalandyratyn. 11-synypta bolashaqta qandaı mamandyqty tańdaıtynymdy oılana bastadym. Bastapqyda men hımııa nemese bıologııamen baılanysty mamandyqqa túskim keldi. Biraq, oılana kele tańdaý sáýlet dızaıny mamandyǵyna tústi. Qazir meniń jumysym mýltfılmdermen baılanysty. Úshinshi kýrsta dostarymmen birge Instagram jelisinde sýret óneri týraly oı bólisip, týyndylardyń maǵynasyna túsinikteme berý maqsatynda akkaýnt ashqanym áli esimde. Biz úshin bul óte qyzyq boldy. Menińshe, osy bastama da sheberligimdi shyńdaýǵa sep bolǵan shyǵar», - dep toqtaldy jas ıllıýstrator.
Arýjannyń qolynan shyqqan týyndylardyń arasynda kópshilik yqylasyna ıe bolǵan – ol Prezıdent Qasym-Jomart Toqaevtyń sýretteri. Osy oraıda, óner ıesi Memleket basshysynyń beınesin anıme stılinde (japon mýltıplıkatsııasy) salý ıdeıasy qalaı paıda bolǵanyn aıtyp berdi.
«Men ózimniń TikTok akkaýntymdy ashyp, onda tanymal fendom jáne anımeniń arnaıy janrlarynda sýret salý týraly vıdeolar júktep júrdim. Keıin Prezıdentti salyp kórdim. Eshqandaı jospar, oı bolǵan joq. Sýret anıme stıline uqsas bolyp shyqty. Bizdiń býyn anıme kórgendi, manga oqyǵandy jaqsy kóredi. Bul sýretim erekshe shyqty, báriniń kóńilinen shyqty. Sodan keıin men Prezıdenttiń taǵy bir beınesin saldym. Ol da kórermenderge unady», - dedi sýretshi.
Arýjan óziniń kartınalaryn kóbine «jartylaı realızm» janrynda salatynyn atap ótti.
Sondaı-aq, ol Memleket basshysynyń sýretteri nelikten jelide keń tanymaldyqqa ıe boldy degen suraqqa jaýap berdi. Onyń qolynan shyqqan bul týyndy kóptegen qaralym jınap, oǵan kóptegen adam, sonyń ishinde sheteldikter de kommentarıı qaldyrǵan.
«Meniń oıymsha, bul erekshe stılimniń arqasy. Onyń jeke tulǵasy da mańyzdy ról atqardy dep oılaımyn. Óıtkeni, ol - elimizdiń Prezıdenti. Osylaısha, óte keremet kombınatsııa boldy. Qarapaıym adamnyń anıme serııasyndaǵy beınesi qandaı bolary bárine de qyzyq. Mysaly, Qazaq handyǵynyń tarıhy týraly baıandaıtyn anımeler shyqsa, óte qyzyq bolar edi», - dep oı bólisti.
Aldaǵy ýaqytta da Prezıdenttiń sýretin sala ma degen suraqqa Arýjan eger aýdıtorııa sony qalasa, onda bul baǵyttaǵy jumysyn jalǵastyratynyn aıtty.
Arýjan Memleket basshysynan bólek, tanymal qazaq tulǵalarynyń, qoǵam qaıratkerleriniń jáne batyrlarynyń sýretterin de salady.
Áleýmettik jelide jas sýretshi salǵan Alash kóshbasshysy Álıhan Bókeıhan, aqyn Іlııas Jansúgirov, etnograf-ǵalym Shoqan Ýálıhanov, Keńes Odaǵynyń Batyrlary Álııa Moldaǵulova men Baýyrjan Momyshuly beınelengen kartınalardy kórýge bolady. Budan bólek, ol saq patshaıymy Tomırıstiń beınesin de salǵan.
«Adamdy qanshalyqty tartymdy etip salsam, aýdıtorııa da sonshalyqty oǵan nazar aýdaratynyn baıqadym. Men óz kórermenderimniń tanymal qaıratkerler týraly kóbirek bilgenin, oqyǵanyn qalaımyn. Bul ónerimdi jalǵastyramyn jáne aldaǵy ýaqytta kóbirek áıel keıipkerlerdiń beınesin salǵym keledi. Sonymen birge, túrli sýretshilermen yntymaqtastyqta jumys isteýdi josparlap otyrmyn», - dep atap ótti Arýjan.
Taıaýda óner ıesi «Almacon» dep atalatyn gık jáne pop-mádenıetiniń (Gık - tanymal mádenıetke qyzyǵýshylyq tanytatyn adam) komıkster festıvaline qatysty. Atalǵan sharaǵa shyǵarmashylyq jáne talantty jastar jınalǵan. Arýjan festıvalge Memleket basshysy beınelengen japsyrmalary bar arnaıy fýtbolka, qalyń jeıdeler men svıtshottar daıyndaǵan. Jas sýretshiniń jumysy sharaǵa qatysýshylar arasynda úlken qyzyǵýshylyq týdyrǵan.
Aıta keteıik, Arýjan bizdiń oqyrmandarymyzǵa Prezıdent Qasym-Jomart Toqaevtyń jas kezi beınelengen anıme stılindegi arnaıy sýret daıyndady.
«Qazirgi ýaqytta men Prezıdenttiń sýretimen stıkerler (japsyrmalar) daıyndap jatyrmyn. Birde dosym Ulybrıtanııa patshaıymy II Elızaveta beınelengen stıkerler jiberdi. Bul jaqsy ıdeıa eken degen oı keldi. Osy jobany júzege asyrǵym keledi», - dep bólisti sýretshi.
Sonymen qatar, Arýjan bizdiń agenttikke bergen suhbaty barysynda taǵy bir eksklıýzıv sýretin kórsetti. Ol - alda jaryq kóretin áıgili kúıshi Qurmanǵazynyń óneri men ómirine negizdelgen mýltfılmniń kadrlary.
Jas ıllıýstrator sheteldiktermen de jumys isteıdi.
«TikTok-qa tirkelgenge deıin ártúrli saıttar arqyly tapsyrystar qabyldap júrdim. Sheteldik klıentterdiń arasynda Japonııa turǵyndary da boldy. Jaqynda menimen arab jazýshysy baılanysqa shyqty. Ol maǵan óziniń kitaby jelisimen manga salýdy usyndy. Jazýshylar mundaı usynysty jıi jasaıdy. ıAǵnı, kitaptyń sıýjeti boıynsha sýretter saldyrady», - dep atap ótti ol.
Arýjan bolashaq jospary jaıly da aıtyp berdi.
«Men birinshi kezekte SMM kýrstarynan ótkim keledi. Óıtkeni, men qazirgi ýaqytta sýretshiniń keremet sýret salyp qana qoımaı, ózin jarnamalaýy kerek ekenin túsindim. Basqalar sizdi baıqaýy úshin ózińiz týraly múmkindiginshe kóp aıtý kerek. 3D anımatsııany da úırengim keledi», - dep túıindedi Arýjan Unarbekova.