Jastar kásipkerligin qoldaý jóninde naqty saıasat joq - Máýlen Áshimbaev
Senat tóraǵasy sondaı-aq jastar kásipkerligin qoldaý jóninde naqty ári pármendi saıasat joq ekenin málimdedi.
«Jastar óz bıznesin ashýdan bas tartýdyń sebepterin 32% bastapqy kapıtaldyń joqtyǵyn jáne 18% ózindik bıznes qurý úshin bilimniń jetispeıtindigin aıtady. Osyǵan baılanysty kásipkerlikti qoldaý baǵdarlamalarynyń tıimdiligine qatysty máseleler týyndaıdy, olarǵa qomaqty bıýdjet qarajaty, onyń ishinde «Atameken» UKP jelisi boıynsha da baǵyttalady», - dedi M. Áshimbaev Senattaǵy «Jańa Qazaqstan: jastar jáne jańǵyrý» taqyrybyndaǵy parlamenttik tyńdaý kezinde.
Jıyn barysynda jastar úshin mańyzdy máselelerdiń biri turǵyn úımen qamtamasyz etý bolyp qalatynyn atap ótti. Qazirgi ýaqytta jumys isteıtin jastarǵa jalǵa beriletin turǵyn úı berý baǵdarlamasy jumys isteıdi.
«Alaıda turǵyn úı máselesiniń ótkirligin eskeresek, bul sharalardyń barlyǵy ázirshe jetkiliksiz. Osy turǵyda biz jastar saıasatynyń jastardyń naqty problemalary men qajettilikterinen birshama alshaqtyǵyn kórip otyrmyz. Memleket jastar saıasaty salasynda túrli baǵdarlamalar men jobalardy júzege asyrýda, alaıda oǵan jastardyń tartylý deńgeıi tómen. Kóbinese ol 10%-dan aspaıdy. Jastardyń respýblıkalyq jáne óńirlik jastar uıymdarynyń jumysyna qatysý deńgeıi de tómen», - dedi Senat tóraǵasy.
Parlamenttik tyńdaýda jastardyń qundylyqtar júıesin qalyptastyrý máseleleri de kóterildi. Keltirilgen derekter boıynsha, qazaqstandyq jastar negizinen dástúrli qundylyqtardy ustanady. Al kásip, ózin-ózi taný, shyǵarmashylyq jáne qoǵamdyq tanylý sııaqty jańǵyrý qundylyqtardyń bizdiń jastar úshin asa mańyzy joq.
Máýlen Áshimbaev osy mysaldardy keltire otyryp, biz úshin otbasy men dostyqtyń dástúrli qundylyqtaryn saqtaý, sondaı-aq jastarǵa ınnovatsııalyq ekonomıka qalyptastyrý úshin qajetti qundylyqtardy sińirý mańyzdy ekenin atap ótti.
Onsyz qoǵamda qundylyqtardyń jańa júıesin boljaıtyn jańa Qazaqstandy qurý qıyn bolady», dep qorytyndylady Senat tóraǵasy.
Budan buryn habarlanǵandaı, M. Áshimbaev barlyq reformanyń túpki maqsaty da jastardyń ál-aýqatyn arttyrýǵa ári olardyń damýyna jaǵdaı jasaýǵa arnalǵanyn atap ótti.
https://kaz.inform.kz/news/zhastar-sayasaty-elimiz-ushin-basym-bagyttardyn-biri-maulen-ashimbaev_a3935149