Jastar kásibin damytýǵa bıýdjetten qosymsha 5 mlrd teńge bólinedi

NUR-SULTAN. QazAqparat – Jastar kásipkerligin damytýǵa bıýdjetten qosymsha 5 mlrd teńge bólinedi. Bul týraly búgin Jastar jylynyń jabylý jáne Volonter jylynyń ashylý saltanatynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

QR Prezıdenti turǵyn úı, jumyspen qamtý, sapaly ári qoljetimdi bilim berý isi qolǵa alynǵanyn aıtty. Elimizdiń iri qalalarynda jumysshy jastarǵa 9 myń páter berý týraly sheshim qabyldanǵanyn eske saldy.

«Ony jalǵa alý quny aıyna 15 myń teńge ǵana bolady. Bıyl 5 myń azamat memleketten grant alyp, jas kásipker atandy. Aldaǵy 3 jyl ishinde olardyń sany 30 myńǵa deıin kóbeıedi. Osyǵan oraı respýblıkalyq bıýdjetten qosymsha 5 mlrd teńgege jýyq qarjy bólemiz. Munan bólek 10 myń jas bıznesmen shaǵyn nesıeniń arqasynda óz óndirisin keńeıtti. Sonyń basym kópshiligi aýdan jáne aýyl turǵyndaryna arnaldy. Bul bastamalar «Dıplommmen aýylǵa» baǵdarlamasyna jańa serpin berdi»,- dedi Q.Toqaev.

Memleket basshysy aýyldy órkendetýge úles qosqysy keletin jastarǵa 6 myńnan astam járdemaqy, baspana alý úshin 4 myńǵa jýyq nesıe berilgenin atap ótti.

«Qurylys otrıadtary jandanyp, 2 myńdaı stýdent jumyspen qamtyldy. Osy jyly qolǵa alynǵan bastamalardyń bári orta merzimge arnalǵan. «Jas kásipker» jáne «Jas maman» jobalary «Eńbek» memlekettik baǵdarlamasyna engizilip, qajetti qarjy bólindi»,- dedi QR Prezıdenti.