Jastar esirtki qylmysyna barmaýy úshin profılaktıkalyq jumysty kúsheıtý kerek - Nurserik Sháripov

<p>ASTANA. KAZINFORM &mdash; Jastar esirtki jasyrý qylmysyna jaza kúsheıtilgenin bilse de, osy zańsyz áreketke baryp jatyr. Bul týraly QR Joǵarǵy sotynyń sýdıasy, Azamattyq ister jónindegi sot alqasynyń tóraǵasy Nurserik Sháripov aıtty.</p>

Búgin Senattyń jalpy otyrysynan keıin esirtki jasyrýmen aınalysyp júrgen jastarǵa qatysty shyǵarylyp jatqan úkimder boıynsha suraq qoıdy. «Qazir 18 jastaǵy jastar 10 jyldan astam merzimge sottalyp jatyr. Bul jaza tym qatal emes pe?», - dep surady tilshiler.

Óz kezeginde N.Sháripov kóbine osy qylmys úshin jastar isti bolyp jatqanyn rastady.

«Bul qylmys boıynsha jaýapkershilik kúsheıtilgen. Osy esirtki jasyrýshylar basqa adamdardy ýlap, emdelmeıtin esirtki túrlerine táýeldi etkenin, Qazaqstannyń bolashaǵyna nuqsan keltirip jatqanyn nazardan tys qaldyrýǵa bolmaıdy. Bul turǵyda jastar esirtki taratý men jasyrý qylmysyna barmaýy úshin profılaktıkalyq jumysty kúsheıtý kerek oılaımyn. Atap aıtqanda, osy qylmystardyń barlyǵy qasaqana jasalǵan áreket dep sanalady. Adamdar esirtki jasyrý qylmysyna jaza kúsheıtilgenin bile tura, baryp jatyr... Osy jaǵdaı adamnyń ózine baılanysty, ıaǵnı bilimine, quqyqtyq sanasyna, zańdy moıyndaýyna qatysty. Jastar úshin aqsha tabýdyń joldary barshylyq, eńbek bırjasyna júginýge bolady», - dedi Joǵarǵy sot sýdıasy.

Aıta keteıik, jaqynda Jarkent qalasynyń aýmaǵynda tyıym salynǵan zattardy taratýmen aınalysqan 20 jastaǵy Almaty turǵyny ustaldy.

Bıyl zańsyz aınalymnan 19 tonnadan astam ártúrli esirtki zattary alyndy.