Jastar ekspedıtsııasy Almatynyń kıeli jerlerin aralady

ALMATY. QazAqparat - Almatyda jastar ekspedıtsııasy qalanyń kıeli jerlerin aralaýdy Təýelsizdik monýmentinen bastady, dep habarlaıdy QazAqparat tilshisi.

aJastar ekspedıtsııa Uly Dala Eliniń kıeli murasymen tanysýǵa jolǵa shyqty. Respýblıka  alańyna jınalǵan bir top stýdentter men QHA músheleri  velosıpedpen  QBTÝ ýnıverstıetine aıaldap , Arbatqa baryp toqtaıdy.

 «Elbasymyz  «Rýhanı jańǵyrý»  baǵdarlamasynda elimizdiń kıeli muralaryna toqtalyp ótken. Osyǵan  oraı jastar ekspedıtsııasynyń baǵytyn Almatynyń  kıeli oryndaryna burdyq. Táýelsizdik monýmentiniń janyna jınalǵanymyzdyń da úlken máni bar. Odan keıin toqtaıtyn QBTÝ da kıeli  oryndardyń biri.  Ár aıaldaǵan jerimizdiń tarıhyn ekskýrsııa jetekshisi baıandap beretin bolady.  Saıahat Arbattaǵy kontserttik baǵdarlamamen aıaqtalady»,-dedi QHA «Jańǵyrý joly» jastar qozǵalysynyń tóraǵasy  Islam  Kýraev.

QHA tóraǵasy orynbasary Qazbek Mamsýrov áleýmettik mańyzdy jobalardy júzege asyrýǵa jastardyń qatysýyna yqpal etý qajettiligin atap ótti.

«Keıbir jastardan surasań, Qazaqstannyń  kıeli oryndaryn bilmeı jatady. Mundaı jobalar osy olqylyqtardyń ornyn toltyrýǵa baǵyttalǵan. Negizgi maqsat - qala jastaryn tarıh murasymen tanystyrý. Máselen, biz jınalǵan Táýelsizdik monýmentindegi  «Altyn adam» arheologtardyń eńbeginiń  jemisi emes pe? Tarıhymyzdy zerdelesek, qasıetti oryndardy jadymyzdy saqtap qala alamyz»,-degen pikirin bildirdi ol.

Uıymdastyrýshylar jastardy velosıpedpen qamtamasyz etip, paıdaly ekskýrsııa júrgizýdi kózdegen. Ekspedıtsııalyq top Almatynyń kıeli sanalatyn 6 tarıhı ornynyń búgin ekeýimen tanysyp, qalǵan tórt nysandy 20 maýsym kúni aralamaq.

Eske sala ketsek, Almatynyń kıeli jerleri geografııasy jobasyna 6 nysan kirgen bolatyn. Olar Raıymbek batyr kesenesi, «Boraldaı saq qorǵandary» qorymy, Qasıetti Voznessensk sobory, A.Baıtursynovtyń mýzeı-úıi, Respýblıka alańy jáne burynǵy úkimet úıiniń ǵımaratynda ornalasqan Qazaq-Brıtan tehnıkalyq ýnıversıteti.