Jastar bolashaǵyn aýylmen baılanystyra ma
Elordadaǵy S.Seıfýllın atyndaǵy Qazaq agrotehnıkalyq ýnıversıtetinde ótken sharaǵa «Dala» men «Qala» komandalary qatysyp, jastar «Dala jaqsy ma, qala jaqsy ma?» degen saýal tóńireginde pikir órbitti.
«Maqtaý», «saqtaý», «baptaý» raýndtary arqyly ótken pikirtalas barysynda «Dala» komandasynyń músheleri Botajan men Nursultan aýyldyń jaqsy tustaryn aıtyp, onda turýdyń qolaıly ekendigin dáleldeýge tyrysty.
«Aýyldyń ekologııasy óte taza. Sondyqtan da óndiriletin ónimniń barlyǵy da sapaly ári adam aǵzasy úshin óte paıdaly bolyp keledi. Buǵan qosa, qaımaǵy buzylmaǵan qazaq aýyldarynda ata-babamyzdyń salt-dástúri saqtalyp, qonaqjaılyq qasıeti buzylmaǵan. Aýylda tursańyz taza aýada demalyp, ekologııalyq taza as iship qana qoımaı rýhanı jaǵynan baı bolasyz», - dedi Botajan.
Al «Qala» komandasynyń músheleri Sherhan men Aıaýlym qalada ómir súrý adam úshin barynsha qolaıly ekendigin aıtyp, qarsylastaryn óz sózderine ılandyrýǵa tyrysty.
Máselen, Aıaýlym aýyldyq jerde aǵylshyn tilinde bilim beretin muǵalimderdiń tapshy ekendigin aıta kele, qalada bul turǵydan alǵanda múmkindiktiń joǵary ekenin alǵa tartty.