Jastar bilimi men kúsh-qýatyn Otanymyzdy órkendetýge jumsaıtynyna senimdimin - N.Nazarbaev

ASTANA. QazAqparat - Jastar bilimi men kúsh-qýatyn Otanymyzdy órkendetýge jumsaıtynyna senimdimin. Bul týraly Memleket basshysy Nursultan Nazarbaev respýblıkalyq telearnalar arqyly Qazaqstan halqyna arnalǵan málimdemesinde aıtty, dep habarlaıdy QazAqparat tilshisi.

«Biz álemdegi ozyq damyǵan 50 eldiń qataryna qosyldyq. 2050 jylǵa deıingi damý baǵdarlamasy ázirlendi. Maqsatymyz - ozyq damyǵan 30 eldiń qataryna ený. Biz qıraǵan KSRO-nyń ornynda zamanaýı naryqtyq ekonomıkasy bar, tabysty Qazaqstan memleketin quryp, kópultty jáne kópkonfessııaly elimizde beıbitshilik pen turaqtylyqty qalyptastyrdyq», - dep atap ótti N.Nazarbaev.

Memleket basshysy kóp ǵasyrlyq tarıhymyzda alǵash ret Qazaqstan Respýblıkasynyń quqyqtyq turǵydan halyqaralyq moıyndalýyn qamtamasyz ete alǵanymyzdy da basa aıtty.

«Memleket retinde bederlenbegen Qazaqstandy álem kartasyna engizdik. Bizdiń óz týymyz, ánuranymyz, eltańbamyz bar», - dedi Elbasy.

N.Nazarbaev 90-jyldardaǵy eń kúrdeli kezeńde «Bolashaq» baǵdarlamasy boıynsha mamandar daıarlaý isi qolǵa alynǵanyn atap ótti.

«Jastardyń laıyqty bilim alyp, álemdik tájirıbeni zertteýine múmkindik týǵyzdyq, sondaı-aq olardyń elimizge óz paıdasyn tıgizýine jol ashtyq. Jahandy daǵdarys jaılaǵanyna qaramastan, biz Astanada álemdik deńgeıdegi ýnıversıtet ashyp, zııatkerlik mektepter saldyq. Egemendikke ıe bolǵan jyldarda dúnıege kelgen jastarymyz memleket qamqorlyǵyn baǵalaı biledi dep senemin. Olar - táýelsiz Qazaqstannyń túlep ushqan jas qyrandary. Jastardyń elimizdi qorǵap, ony nyǵaıta túsetinine, ózderiniń bar bilimi men kúsh-qýatyn Otanymyzdy órkendetýge jumsaıtynyna senimdimin», - dedi N.Nazarbaev.