Jastar arasynda jumyssyz qyz-kelinshekter sany 11% artty

ASTANA. QazAqparat – Jumyssyz jastardyń 12% turaqty tabys kózinsiz júrgenine bir jyldan asqan. Finprom.kz resýrsy osyndaı derek keltirip otyr, dep habarlaıdy QazAqparat tilshisi.

«Jastar arasyndaǵy jumyssyzdyqpen kúres jemisin berip keledi. Olardyń úlesi kún sanap azaıyp jatyr. Alaıda jumyssyz jastardyń 12% astamy bir jyldan astam ýaqyt jumys taba almaı júr.

Úshinshi toqsannyń qorytyndysy boıynsha Qazaqstanda 72,2 myń jumyssyz jas bolǵan. Bul byltyrǵy statıstıkadan 6,9% az.

Jumyssyz erler sany 28,1%, ıaǵnı, 25,4 myńǵa deıin qysqarsa, jumyssyz áıelder sany, kerisinshe, 10,9%, ıaǵnı, 46,8 myń adamǵa deıin ósken.

Degenmen, 2021 jyldyń úshinshi toqsanynda elimizde jasy 29-dan aspaǵan 77,5 myń jumyssyz bolsa, bıyl olardyń sany 6,9% azaıyp otyr.

Osylaısha jumyssyz jastardyń sany úshinshi jyl qatarynan azaıǵan.

Óńirler arasynda jumyssyz jastardyń kóbi Almatyda shoǵyrlanǵan – 12,5 myń adam (byltyrǵydan 10,6% az).

Sondaı-aq, el astanasynda 7,8 myń jas (+16,9%) jáne Túrkistan oblysynda 6,7 myń jas (+10,7%) jumyssyz júr», - dep jazady Finprom.kz.

Jumyssyz jastar eń az óńir Ulytaý oblysy – 665 adam.

Resýrs muny qaıtadan ashylyp jatqan oblystyń statıtıkasy durys qalyptaspaı jatýy yqtımaldyǵymen baılanystyrady.

«Jumyssyz jastardyń kóbi, naqtyraq aıtsaq, 20,9 myń adam jyldyń úshinshi toqsanynda 1 aıdan 3 aıǵa deıin jumys izdep júrgen. Bul byltyrǵymen salystyrǵanda 7,3% az.

Bir aı ishinde jumys tapqan 29 jasqa deıingi adamdar sany 4,8% ósip, 16,4 myńǵa jetken.

18,5 myń jumyssyz jas 3 aıdan 6 aıǵa deıin, 7,5 myń jumyssyz jas jarty jyldan bir jylǵa deıin, 8,8 myń jumyssyz jas bir jyldan astam ýaqyt jumys izdep júr», - dep jazylǵan saraptamada.