Jasotandyqtar elimizdegi «Qaharman dańǵyldaryn» tazalady
Jas belsendiler Jeńis kúniniń qarsańynda elimizdiń 16 aımaǵynda «Qaharman dańǵyly» atalatyn aktsııany qolǵa aldy. Astanada bul bastamaǵa Saryarqa ákimdigi qoldaý bildirdi. Demalys kúnderi Ekinshi dúnıejúzilik soǵysy batyrlarynyń attarymen atalatyn kóshelerde senbilik ótkizip, ardagerlerge arnalǵan eskertkishterdi tazalady. Meıram aldynda uıymdastyrylyp otyrǵan bul shara jastar úshin jaı senbilik emes, soǵys ardagerleri men elimizdiń azattyǵy jolynda jandaryn qurban etken jandarǵa degen qurmet.
«Qaharman dańǵyly» ádettegi senbilik emes, tazartyp jatqan kóshelerimiz de kezdeısoq emes. Barlyǵy da batyrlarymyzdyń atymen atalǵan. Biz, jastar óz qaharmandarymyzdy umytpaýymyz qajet. Ardagerlerge birkúndik eske alýdan áldeqaıda mańyzdyraq birnárse bar. Ol - maıdangerlerdi tyńdaý, áńgimelesý jáne keńesterine qulaq asý», - deıdi «Jas Otan» belsendisi Marhat.
Jasotandyqtar úshin bul birkúndik aktsııa emes. Birneshe jyl boıy «Ardagerlerdi ardaqtaıyq» jobasyn qolǵa alyp, elimizdiń barlyq aımaqtarynda turatyn maıdangerlerge jyl boıy kómek kórsetip keledi. Barlyǵy egde jasta bolǵandyqtan, kóbine úı sharýashylyǵyn ózderi atqara almaıdy. Mundaıda sol aımaqtyń belsendi jastary úıleri men aýlasyn jınastyryp, qol ushyn sozýǵa daıyn.
Al búgingi seısenbidegi senbilikke Astana qalasynda 60 belsendi, Soltústik Qazaqstan oblysynda da 60 jas, Qyzylorda oblysy boıynsha - 300, Mańǵystaý oblysynda -103, Atyraýda 80 adam qatyssa, Aqtóbe 175 jas jalpy 7 kósheni tazartqan. Sondaı-aq, Qaraǵandyda 40 belsendi Martbek Mamyraev atyndaǵy alleıany tazartyp, kóshetter otyrǵyzdy.