Jasóspirimdi jezókshelikke májbúrlegen: Qyzylordada keleńsizdikke jol bergender qyzmetinen ketti
Qyzylorda oblysy ákimdiginiń baspasóz qyzmetiniń habarlaýynsha, búgin, 16 tamyzda Qyzylorda oblysynyń ákimi Nurlybek Nálibaev jınalys ótkizip, kámeletke tolmaǵan qyzdy jezókshelikpen aınalysýǵa májbúrleý faktisine ýaqytynda kedergi keltirmegen ýákiletti tulǵalarǵa qatań sharalar qabyldaýdy qaramaǵyndaǵylardan talap etti.
Oblys ákimi atap ótkendeı, birneshe kúnnen beri áleýmettik jeliler men buqaralyq aqparat quraldarynda kámeletke tolmaǵan qyzdy jezókshelikpen aınalysýǵa májbúrlegen Qyzylordadaǵy mektep túlekteriniń áreketi talqylanyp jatyr.
Aımaq basshysy bul atyshýly qylmystan jarty jylǵa jýyq ýaqyttan beri polıtsııa departamentiniń uıymdasqan qylmyspen kúres basqarmasy men qyzǵa sabaq beretin muǵalimder beıhabar bolǵanyn qatań synǵa aldy.
– Áleýmettik jelilerde ýchaskelik polıtsııa ınspektory men mekteptiń ıývenaldy polıtsııa qyzmetkeri máseleden habardar bolǵandyǵy jóninde aqparat tarady. Negizgi salǵyrttyq osy qyzmetkerlerden bastalǵan. Ózderine bekitilgen aýmaqtaǵy ahýaldy aldyn ala zerdelep, ár turǵyndy baqylaýy tıis edi. Biraq, ondaı jumys múlde júrgizilmegen. Bilim salasynyń mamandary da qyzmetterine nemquraıly qaraǵan. Mektep basshylyǵy, pedagogter, mektep ınspektory, óz mindetterińizdi oryndamaǵansyzdar! Mektep psıhologi, synyp jetekshileri, áleýmettik pedagog, mektep dırektorynyń tárbıe isi jónindegi orynbasary jáne dırektor zań aıasynda qandaı da bir naqty qadamǵa barmaǵan, - dedi N.Nálibaev.
Oblys ákimi oqýshynyń sabaqtan jıi qalatynyna tıisti mamandardyń nazar aýdarmaǵanyn, ata-anasymen tıisti deńgeıde profılaktıkalyq jumys júrgizbegenin, tek máseleni jasyryp-jabýǵa tyrysqandaryn aıtty.
– Búginnen bastap №7 mektep-lıtseı dırektory, tárbıe isi jónindegi orynbasary, psıhologi, áleýmettik pedagogi, synyp jetekshileri jumystan bosatylsyn. Qyzylorda qalasy ákiminiń osy salaǵa jaýapty orynbasaryna, qalalyq bilim bóliminiń basshysyna qatań sógis, bólimniń tárbıe jónindegi jaýapty mamanyna jumystan bosatý sharasy qoldanylsyn. Bilim basqarmasynyń basshysyna óz mindetterin tıisti deńgeıde oryndamaǵany úshin qyzmetine tolyq sáıkes emestigi týraly eskertý beremin. Ózine júktelgen mindetti tıisti deńgeıde oryndamaǵan mektep ınspektory men ýchaskelik polıtsııa ınspektory, ony baqylamaǵan kámeletke tolmaǵandar isi jónindegi ıývenaldy polıtsııa bólimshesi, qalalyq polıtsııa basqarmasy men oblystyq jergilikti polıtsııa qyzmeti uıymdasqan qylmysqa qarsy kúres basqarmasy tikeleı kináli. Osy oraıda, jaýapty mamandardyń jaýapkershiligin qarap, qyzmetinen bosatýǵa deıingi kadrlyq sheshimder qabyldansyn. Qabyldanǵan sheshimder týraly jumys aıaǵyna deıin baıandańyz, - dedi N.Nálibaev.
Bala quqyqtaryn qorǵaý jónindegi oblystyq ýákil Jaqsygúl Toǵanovaǵa oblystyń bilim berý uıymdaryndaǵy jumystarǵa taldaý júrgizip, dereý jumys tobyn qurý tapsyryldy. Bul rette aldyn alý sharalaryn qoldanyp, qolaısyz otbasylardy jáne táýlikke jalǵa beriletin páterlerdi aralaý qajet ekeni aıtyldy.
Aımaq basshysy oqıǵadan zardap shekken otbasyna jan-jaqty kómek kórsetýdi, tergeýdiń barynsha obektıvti júrgizilýin talap etti.
– Qozǵalǵan qylmystyq is boıynsha tergep-tekserý amaldarynyń obektıvti júrgizilýi mindetteledi. Qylmysqa qatysy bar adamnyń barlyǵy zań aıasynda tıisti jaýapkershilikke tartylatyn bolsyn! Bul máseleni tikeleı baqylaýymda ustaımyn, - dep túıindedi Nurlybek Nálibaev.
Eske salsaq, Qyzylorda qalasynda mektep oqýshylary «synyptasyn seks-quldyqta ustady» dep kúdikke ilindi. Bir top jasóspirim 16 jastaǵy qyzdy qınap ustaǵany, esirtki berip, jezókshelikpen aınalysýǵa májbúrlegeni týraly aqparat tarady. Oqýshy qyzdyń ata-anasy jaǵdaıdy qoǵamdyq qorǵa habarlaǵan. Al oqýshynyń «seks-quldyqta júrgenin» onyń dosy anyqtaǵan.
Qyzylorda polıtsııasy atalǵan derek boıynsha kúdiktilerdi ustap, ýaqytsha ustaý ızolıatoryna qamady. Keıin kúdikke ilingen mektep oqýshylary úıqamaqqa aýystyryldy.