Jasóspirimderde vaktsınatsııa jeńil ótip jatyr – elordalyq dáriger
– 12 jastan asqan jasóspirimderdi vaktsınatsııalaý qalaı júrip jatyr. Siz jumys isteıtin emhanada qansha jasóspirim ekpe aldy?
– 15 qarashadan bastap 12 jastan 18 jasqa deıingi jasóspirimder arasynda COVID-19-ǵa qarsy ekpe Nur-Sultan qalasy boıynsha bastaldy. KVI-ge qarsy vaktsınatsııalaý bilim berý uıymdarynyń egý pýnkterinde, sondaı-aq ata-analardyń qalaýy boıynsha emhanada júrgizilýde.
Qazirgi tańda vaktsınatsııalaý qarqyny ósip kele jatyr. Ata-analarymen kelip, ekpe alyp jatqan jasóspirimder sany kóbeıýde. Bizdiń emhana boıynsha ekpe alǵan balalar sany – 150.
– Jasóspirimderge vaktsına alý mindetti me?
– Ekpe alý erikti túrde, tek ata-anasynyń kelisimimen jasalynady. Ekpe kerek pe, joq pa – ony azamattar ózderi sheshedi, biraq biz ekpe alýǵa shaqyramyz, óıtkeni qazirgi ýaqytqa vaktsına aýrýdyń aldyn alýdyń negizgi profılaktıkalyq joly.
– Qandaı jasóspirimderge ekpe alýǵa qarsy kórsetkishter bar?
– 12 jasqa deıingi balalarǵa, sondaı-aq anamnezinde polıetılenglıkolge nemese týystas molekýlalarǵa aýyr allergııalyq reaktsııasy bar adamdarǵa ekpe salynbaıdy, sebebi vaktsına quramynda polıetılenglıkol bar.
Aıta keteıin, qandaı da bir basqa vaktsına engizilgennen keıin nemese buryn Komırnatı engizilgennen keıin aýyr allergııalyq reaktsııa nemese tynys alý problemalary bolsa, sondaı-aq kez kelgen ınektsııadan/ýkoldan keıin esten taný, qurysý, joǵary temperatýramen jiti ınfektsııalyq aýrýlar jáne sozylmaly aýrýlardyń asqynýy kezinde, qannyń uıýymen, onyń ishinde trombtardyń paıda bolýyna qarsy dári-dármekterdi qabyldaýmen baılanysty problemalar bolǵan jaǵdaıda jáne aýrýǵa baılanysty ımmýndyq júıe álsiregen (AITV ınfektsııasy, steroıdty preparattardy qabyldaý) kezde vaktsınatsııa saqtyqpen júrgiziledi.
– Ekpe alǵan jasóspirimderdiń densaýlyǵy qalaı? Olardyń arasynda ekpeni aýyr qabyldaǵandary boldy ma?
– Búginge deıin 150 jasóspirimge ekpe jasaldy. Olardyń ishinde aýyr reaktsııalar tirkelgen joq. Kerisinshe, balalarda jeńil túrde ótip jatyr. Bizdiń baıqaýymyzsha, eki jasóspirimde ǵana sýbfebrıldi temperatýra, vaktsınany engizgen jerde jergilikti reaktsııa baıqaldy. 1-2 kúnniń ishinde bul reaktsııalar bilinbeı ketedi.
Jasósirimder ekpeden keıin sabaqqa kelip, ádettegi ómir saltyn jalǵastyrýda.
– Jasóspirimderdi vaktsınatsııalaýdy ata-analar qalaı qabyldaýda?
Ekpege balalarymen kelgen ata-analar óte jaqsy qabyldaýda. Olar ekpeniń mańyzdylyǵyn túsinedi, balalaryna qoldaý kórsetip, janynda boldy.
Jalpy osy aıda №7 qalalyq emhana boıynsha 300 jasóspirimdi vaktsınatsııalaý josparlanyp otyr. Ekpe tek erikti túrde, jasóspirimniń ata-anasynyń nemese zańdy ókiliniń ruqsatymen jasalady.