Jasóspirim sanasyna teris áser etetin aqparaty bar 12 myńnan astam sheteldik saıt anyqtaldy

ASTANA. QazAqparat – Jyl basynan beri jastardyń sanasyna teris áser etetin 12 myńnan astam sheteldik ınternet-resýrs anyqtaldy. Mundaı derekterdi Іshki ister mınıstrliginde ótken brıfıngide Ákimshilik polıtsııa komıtetiniń erekshe tapsyrmalar jónindegi aǵa ınspektory Leıla Álipbaeva aıtty, dep habarlaıdy QazAqparat tilshisi.

«Árıne, áleýmettik jeliler balalardyń moraldyq jáne rýhanı damýyna teris áser etetinin de joqqa shyǵarýǵa bolmaıdy. Balalar ınternette paıdaly aqparatpen qatar, teris pıǵyldy málimetter bar ekenin túsinýi kerek. Bıyl Іshki ister mınıstrligi óz quzyreti sheginde 12 myńnan astam sheteldik zańsyz ınternet-resýrsty anyqtady. Ol resýrstar týraly derekter buǵattaý úshin Aqparat jáne qoǵamdyq damý mınıstrliginiń «Kıbernadzor» aqparattyq júıesine engizildi. Onyń ishinde búginde 2 708 saıt buǵattaldy», - dedi Leıla Álipbaeva vedomstvonyń baspasóz alańynda ótken brıfıngide.

Sonymen birge aǵa ınspektor bıyl jasóspirimder jasaǵan qylmystar sany 11 paıyzǵa óskenin atap ótti.