Qazaqstan jasyl sýtegi óndirisi boıynsha Ortalyq Azııada kóshbasshy bolýǵa laıyq - sarapshy

<p>Úkimet jospary boıynsha 2060 jylǵa qaraı elimiz kómirtegi beıtaraptyǵyna qol jetkizýi tıis. Bul maqsatta jasyl sýtegi óndirisin damytý jáne ony syrtqa eksporttaý mejelenip otyr. Brıtanııalyq sarapshylar Londonda bas qosyp, ekologııalyq taza otyn óndirisin Qazaqstanda jetildirý máselesin talqylady, dep habarlaıdy <a href="Kazinform" target="_blank" rel="noopener">Kazinform</a>.</p>

Qorshaǵan ortaǵa zııan keltirmeıtin jasyl sýtegi jel, kún sııaqty jańartylatyn energııa kózderinen óndiriledi. Ǵalymdardyń paıymdaýynsha, ol bolashaqta munaı, gaz jáne kómirdi almastyrýy múmkin. Elimizdiń keıbir óńirlerinde jyl boıy kúshti jel soǵyp, kúnniń kózi sáýlesin shashyp turatynyn eskersek Qazaqstannyń «jasyl sýtegi» óndirisin damytýdaǵy áleýeti zor.

«Qazaqstan sońǵy 30 jyl kóleminde álemge energııa eksporttaý boıynsha 9-orynda keledi. Bul baǵyttaǵy jumystardy jetildirip, aldaǵy 20-30 jyl ishinde zor jetistikterge jetýge memlekettiń múmkindigi mol. Biz Uly dala elin jasyl sýtegi óndirisiniń Ortalyq Azııadaǵy ortalyǵy retinde qarastyryp otyrmyz. Bul kóshbasshylyq rólge Qazaqstan ábden laıyq», - deıdi Policy exchange saraptamalyq ortalyǵynyń aǵa ǵylymı qyzmetkeri Aleks Sımakov.

Qazaqstannyń Ulybrıtanııadaǵy elshiligi uıymdastyrǵan shara barysynda jasyl sýtegi óndirisine ınvestıtsııa tartý boıynsha el úkimetiniń atqaryp jatqan jumystary sóz boldy. Sondaı-aq bizde ónimdi eńbek etip jatqan sheteldik ınvestordyń aıaq alysy týraly da aıtyldy. Qazaqstanǵa ınvestıtsııa quıǵysy keletinderge Brıtan úkimeti qandaı qoldaý kórsetetini týraly da áńgime qozǵaldy. Sharaǵa áleýetti ınvestorlarmen qatar konsaltıng qyzmetimen aınalysatyn kompanııalardyń ókilderi de qatysty.

«Bizdiń mekeme Taıaý Shyǵysta, Saýd Arabııasynda jáne basqa da kórshiles memleketterde osyǵan uqsas birneshe jobany júzege asyryp keledi. Qazaqstandaǵy sýtegi ekonomıkasynyń damýyna qandaı úles qosa alatynymyzdy túsiný úshin, qandaı ozyq tehnologııalar engizýge bolatynyn bilý úshin osy sharaǵa qatysyp jatyrmyz», - deıdi ekolog-ǵalym Saımon Spýner.

Foto: Ǵalymjan Qaramanuly/Kazinform

Búginde Ulybrıtanııa sýtegi ekonomıkasy damyǵan elderdiń biri. Tumandy Albıon 2030 jylǵa qaraı energetıkanyń úshten birin sýtegige aýystyrýdy mejelep otyr. 100 myńǵa jýyq jańa jumys orny ashýylady degen jospar bar. 2050 jylǵa qaraı naryq kólemi 13 mıllıard sterlıng fýntyna baǵalanady, deıdi bıliktegiler.