Jasandy ıntellekt qazaqsha túsinedi

ASTANA. QazAqparat – Búgin Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń bas dırektory Maqpal Jumabaı men «Speech Lab» JShS dırektory Juldyz Tatagýlova birneshe aıdan beri júrgizilip kele jatqan kelissózderdiń nátıjesinde yntymaqtastyq týraly memorandýmǵa qol qoıdy, dep habarlaıdy QazAqparat.

«Speech Lab» - jasandy ıntellektini elimizdiń aýdıtorııasyna beıimdeý boıynsha úlken bastamalardy júzege asyryp kele jatqan kompanııa.

Atalǵan kompanııa men «Til-Qazyna» ortalyǵy qazaq tilin tanýǵa qabiletti jasandy ıntellektini jáne sóıleý sıntezin damytýǵa birlese kúsh salady. Bul – qazaq tilin ǵylym tiline aınaldyrý boıynsha atqarylyp jatqan eń úlken qadamdardyń biri. Demek, bolashaqta «Siri», «Alısa» syndy dybys kómekshileri qazaq tilinde aıtylǵan barlyq aqparatty sapaly óńdep, taldaı alady. Bastama júzege asqannan keıin muny memlekettik mekemeler men bıznes salasynda da keńinen qoldanýǵa bolady. Bul qyzmet kórsetý salasyn ońtaılandyrýǵa, memlekettik tildiń qoldanys aıasyn keńeıtýge múmkindik beredi.

Mundaı úlken jobanyń sátti júzege asýy úshin asa úlken kólemdegi sapaly kontent qajet. Sáıkesinshe, mundaı aýqymdy kontentpen qamtamasyz etý mindetin «Til-Qazyna» ortalyǵy júzege asyrady.