Jasandy ıntellekt mamandyqtardy qalaı ózgertedi — sarapshy pikiri
Aıta keteıik, Astanada jasandy ıntellekt taqyrybyna arnalǵan Technowomen Central Asia halyqaralyq forýmy ótýde.
«Biz jasandy ıntellektiniń ómirimizge, otbasymyzǵa, bıznesimizge jáne eńbek naryǵyna qalaı áser etetinin ár qyrynan qarastyrǵymyz keledi. Sondaı-aq, jasandy ıntellektti kúndelikti ómirde qalaı qoldanýǵa bolady, mansapty qalaı qurýǵa bolady, qandaı startaptar basymdyq alady, qandaı daǵdylardy damytý kerek — barlyq osy praktıkalyq nárselerdi jastarymyzǵa, áıelderge, jalpy qoǵamǵa óz ómirlerinde qoldanýy úshin keńinen taratqymyz keledi», — dedi Á. Shójeeva forým kýlýarynda.
Onyń pikirinshe, jasandy ıntellekttiń damýy bolashaqta kóptegen mamandyqtardyń ózgerýine ákeledi.
«Mamandyqtardyń úsh toby bar. Birinshisi — aǵash ustasy sekildi fızıkalyq eńbekpen baılanysty. Bul mamandyq saqtalýy múmkin, biraq keıbir jańa quraldar kómegimen ózgeriske ushyraıdy. Ǵalym sııaqty joǵary ıntellektýaldy jumys bar, olar da saqtalady. Biraq osy eki aradaǵy koll ortalyq operatory, kontroller, dıktor sııaqty mamandyqtar qazirdiń ózinde túrlendi. Rentgen derekterin qarap, dıagnoz qoıatyn rentgenolog-dáriger mamandyǵyna da dıagnozdy jaqsyraq jasaıtyn jasandy ıntellekt jobalary kelip jatyr. Biraq áli de normatıvtik-quqyqtyq baza men zańnama bul jobalardy engizýge daıyn emes. Tsıfrlyq zańnamany damytyp, naýqastardy emdeý hattamalaryna engize bastaǵanda ǵana rentgenolog mamandyǵy ózgeredi. Sonda JI kómegimen jumys isteıtin dáriger biliktiligi bolatyn shyǵar», — dep sanaıdy TechnoWomen tóraǵasy.
Onyń aıtýynsha, jaqynda elde tsıfrlyq quzyreti joǵary mamandarǵa qajettilik eki esege artady.
«Kóptegen kúndelikti jumystar avtomattandyrylady. IT-kásipkerlikti nemese jasandy ıntellektini qoldanatyn mamandyqtardy tańdaý qajet. Bul rette bizde de sátti jobalar bar — kóz toryn dıagnostıkalaý jobasyn damytatyn otandasymyz bar. Sondaı-aq, bizdiń qyzdar Kaspııdiń teńiz ekojúıelerin tazartý boıynsha JI jobasyn ázirleýde. Mundaı jobalar qazirdiń ózinde bar jáne bul qýantady. TechnoWomen jańa startaptarǵa tálimgerlik qoldaý kórsetedi jáne jobalardy ilgeriletý máselelerinde kómektesedi», — deıdi Á. Shójeeva.