Jas sarbaz Álibek Qalbaıdyń ólimi: Eki áskerı shendi qyzmetten qýyldy

NUR-SULTAN. QazAqparat – Áskerde qaıtys bolǵan jas sarbaz Álibek Qalbaıdyń ólimine qatysty tergeý sharasy jalǵasyp jatyr. Bul týraly QR Qorǵanys mınıstrliginen málim etti, dep habarlaıdy QazAqparat tilshisi.

«2022 jyldyń basynda Qazaqstan Respýblıkasy Qarýly kúshterinde merzimdi qyzmettegi áskerı qyzmetshi, qatardaǵy jaýynger Á. S. Qalbaı qaıtys boldy. Bul rette, jeke quramdy jetkiliksiz baqylaý jáne 30212 áskerı bóliminiń laýazymdy tulǵalary tarapynan jumystaǵy olqylyqtar faktisi boıynsha Qorǵanys mınıstriniń tapsyrmasy boıynsha qyzmettik tergeý júrgizildi. Nátıjesinde 30212 áskerı bóliminiń komandıri jáne osy bólimniń oqý rotasynyń komandıri laýazymynan shettetildi», - degen jaýap berildi mınıstrlikten QazAqparat saýalyna.

Odan bólek, sarbaz ólimine baılanysty atalǵan áskerı bólimniń taǵy 3 laýazymdy tulǵasy qatań tártiptik jaýapkershilikke tartylǵan.

Sondaı-aq Qorǵanys mınıstrligi Álibek Qalbaıdyń ólimine qatysty tergeý sharasynyń jalǵasyp jatqanyn habarlady.

«30212 áskerı bóliminiń kadr quramynyń sapasyn arttyrý maqsatynda qanaǵattanarlyqsyz nátıje kórsetken laýazymdy tulǵalarǵa qatysty uıymdastyrý-kadr sıpatyndaǵy sharalardy iske asyra otyryp, 1 aı merzimde ofıtserlik jáne serjanttyq quramdy attestattaýdan ótkizý týraly sheshim qabyldandy. Attestattaýdan keıin bosaǵan laýazymdy oryndarǵa kadr jınaý úshin irikteý júredi», - deıdi vedomstvodan.

Eske sala keteıik, bıyl 22 sáýirde Álibek Qalbaı Jambyl oblysynda Gvardeısk áskerı qalashyǵyndaǵy gospıtalde merzimdi áskerı qyzmetke shaqyrylǵan sarbaz kóz jumdy.

Prezıdent Qasym-Jomart Toqaev áskerde qaza tapqan sarbazdyń otbasyna kóńil aıtyp, istiń sebebin anyqtaýdy tapsyrdy.

Odan bólek, Qorǵanys mınıstrliginen Álibek Qalbaıdyń otbasyna qarjylaı kómek kórsetiletini aıtyldy.