«Jas sarapshy-2012» respýblıkalyq baıqaýynyń jeńimpazdary marapattaldy

ASTANA. 29 qarasha. QazAqparat - Búgin Astana qalasynda  qazaqstandyq joǵary oqý oryndarynyń ekonomıka mamandyqtary boıynsha 3-4 kýrs stýdentteriniń arasynda ótkizilgen «Jas sarapshy-2012» respýblıkalyq baıqaýynyń jeńimpazdaryn marapattaý rásimi  ótkizildi.

Bul týraly «Bolashaq» qaýymdastyǵynyń baspas óz qyzmeti habarlady.

Baıqaý jeńimpazdary: 1 oryn - Uljan Maratqyzy (QBTÝ), 2 oryn - Talshyn Toqyjanova  (QBTÝ) men Aıjan Muqyshbaeva (QBTÝ), 3 oryn - Dana Baıǵazınova (T.Rysqulov atyndaǵy QazEÝ), Leıla Ábisheva (QBTÝ), Anargúl Qabıeva (L.N. Gýmılev atyndaǵy EUÝ).

Baıqaý maqsaty - stýdentterdiń ǵylymı zertteýlerge degen qyzyǵýshylyǵyn arttyrý, daryndy jastarǵa qoldaý kórsetý, QR joǵary oqý oryndarynyń daıyndyq deńgeıin arttyrý. Baıqaýdy Qazaqstan Respýblıkasynyń Mádenıet jáne aqparat mınıstrliginiń qoldaýymen «Bolashaq» qaýymdastyǵy men «Ekonomıkalyq zertteýler ınstıtýty» AQ ótkizdi.

Baıqaý qazaq jáne orys tilderinde ótkizildi. «Jas sarapshy-2012» baıqaýy qazan aıynda bastaldy. Qatysýshylar baıqaý uıymdastyrýshylaryna ózderi týraly aqparat jáne  «Qazaqstan Respýblıkasynyń ulttyq qory: qarajatty tıimdi qoldaný saıasaty»; «Qazaqstan Respýblıkasynyń zeınetaqy júıesi: kemshilikteri men olardy joıý joldary»; «Qazaqstanda halyqtyq IPO bolashaǵy: oń jáne teris jaqtary»; «Qazaqstannyń orta jáne shaǵyn bıznesiniń Biryńǵaı ekonomıkalyq keńistikte básekege qabilettiligi: sharýashylyq jaǵdaılaryn salystyrý» degen ekonomıkalyq taqyryptar boıynsha esse joldady.

Oǵan elimizdiń 40 ýnıversıtetinen 234 stýdent qatysty. Alǵashqy irikteý kezeńiniń nátıjesinde ekinshi kezeńge 31 qatysýshy ótti.

Ekinshi kezeńde qatysýshylar «Qazaqstannyń búgingi ekonomıkasyndaǵy damý ınstıtýttarynyń róli», «Qazaqstan Úkimetiniń daǵdarysqa qarsy saıasaty», «Mashına jasaý salasynyń damýy», «Eýropa odaǵy men Biryńǵaı ekonomıkalyq keńistiktegi ıntegratsııalyq úrdisterdi salystyrý»i taqyryptary boıynsha keıs tapsyrmalaryn oryndady:

Ekinshi kezeńniń qorytyndysy boıynsha 11 stýdent Astana qalasynda ótkizilgen suhbattasýǵa qatysty. «Ekonomıkalyq zertteýler ınstıtýty» AQ mamandary, «Bolashaq» Qaýymdastyǵy músheleri, Nazarbaev ýnıversıtetiniń ókilderi engen baıqaý komıssııasy ótken suhbattasýdyń nátıjesinde baıqaýdyń alty júldegerin anyqtady. 

Baıqaý jeńimpazdaryna dıplomdar men baǵaly syılyqtar tabys etildi. Onyń ishinde, 1 oryn úshin - Ipad 3, ekinshi oryn úshin Samsung Galaxy Tab 2, úshinshi oryn úshin - M-Book mobıldi kitaphanasy. Baıqaýdyń sońǵy kezeńiniń qatysýshylaryna «Meloman» dúkenderi júıesinen kitap satyp alýǵa arnalǵan syılyq sertıfıkattary berildi. Sonymen qatar, stýdentter ekonomıka salasyndaǵy kompanııalarda tájirıbe alý múmkinshiligine ıe boldy.

Uıymdastyrýshylar «Jas sarapshy» baıqaýyn kelesi jyly úsh mamandyq boıynsha ótkizýdi josparlap otyr.

Іs-sharaǵa baıqaý jeńimpazdary, «Bolashaq» qaýymdastyǵy men «Ekonomıkalyq zertteýler ınstıtýty» AQ ókilderi, BAQ ókilderi qatysty.