«Jas óren» respýblıkalyq baıqaýynyń jeńimpazdary anyqtaldy
Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen uıymdastyrylǵan konkýrs 2022 jyldyń 15 shildesi men 15 qazany aralyǵynda ótti.
Prezıdent jarııalaǵan bıylǵy Balalar jylynda ótkizilgen máni zor bul jobanyń basty maqsaty – balalarǵa arnalǵan otandyq shyǵarmalardy dáripteý, balalar ánderi men óleńderiniń repertýaryn tolyqtyrý, sondaı-aq elimizdegi balalar kompozıtorlary men aqyndardyń shyǵarmalaryn balabaqshalar men mektepterge, balalardyń mýzyka mekemelerine, sondaı-aq shalǵaıdaǵy aýyldyq kitaphanalarǵa deıin qoljetimdi etý arqyly rýhanı-adamgershilik qundylyqtardy nasıhattaý.
Bul rette, Otanǵa qyzmet etý, el men jerge degen joǵary patrıottyq sezimdi qalyptastyratyn óner týyndylaryn shyǵarý jáne osy arqyly ulttyq rýhanııatqa úles qosqysy keletin otandyq avtorlardy qoldaýdyń mańyzy zor.
Baıqaýǵa qatysýshylardyń kásibı biligi men jas erekshelikterine shekteý qoıylmaǵan. Konkýrs tartysty ótti.
«QAZAQSTAN» telearnasy arqyly kórsetilgen konkýrs týraly habarlama – mektep oqýshylarynan bastap aǵa býynnyń ókilderine deıingi qatysýshylardyń zor qyzyǵýshylyǵyn týdyrdy (barlyǵy 405 ótinish).
Bundaı qubylys – qoǵamnyń rýhanı-adamgershilik turǵysyndaǵy ósýi men ózin-ózi damytýdyń keń etek alyp kele jatqanyn kórsetse kerek.
Baıqaýǵa usynylǵan 204 shyǵarmanyń 133 – poezııa, 71 –án janrynda boldy. Baıqaýdyń qazylar alqasy quramyna eńbek sińirgen belgili mádenıet pen óner jáne qoǵam qaıratkerleri, memlekettik uıym ókilderi kirdi.
«Jas óren» respýblıkalyq baıqaýynyń laýreattary men dıplomanttaryn marapattaý rásimi elimizdiń Táýelsizdik kúnine arnalǵan merekelik Gala-kontsertte ótedi dep josparlanýda.
Atalǵan shara barysynda jınalǵan jurtshylyq konkýrs laýreattary men dıplomanttarynyń shyǵarmalarymen tanysa alady.