Jas ónertapqyshtar Astanadaǵy chempıonatta óz sheberlikterin kórsetti
Respýblıkanyń barlyq óńirlerinen kelgen balalar men jasóspirimderdiń 200 komandasy óz ónertabystaryn tanystyrdy.
Sharaǵa qatysqan elorda ákimi Áset Isekeshev jastardyń osyndaı mańyzdy jarystardyń el Táýelsizdiginiń 25 jyldyǵymen tuspa-tus kelgeni qýantatynyn atap kórsetti.
«Búgin bizdiń balalardyń arasyndaǵy novatolardyń, robototehnıkterdiń, ónertapqyshtardyń qozǵalysyna jol salatyn eki mańyzdy chempıonattyń ótip jatqany qýantady. Bul jarystarǵa 200-den asa adam qatysýda, robototehnıkadan týrnırge 160 daryndy bala kelip, jaqsy jobalary men ónertabystaryn tanystyrdy. Drondar jarysy da ınnovatsııalyq chempıonat sanalady. Osy týrnırlerdi jyl saıyn ótkizetin bolamyz. Bıyl biz robot qurastyrýshy úzdikter úshin 1 300 000 teńge kóleminde arnaıy júlde taǵaıyndadyq. Biz bul qozǵalysty qoldaımyz, jáne kelesi jyly elordanyń 42 mektebinde robototehnıka synyptaryn jaraqtaımyz», - dedi Áset Isekeshev.
Saıystarǵa qatysý úshin elordaǵa 10-25 jas aralyǵyndaǵy ónertapqyshtar keldi. Al drondar jarysy qonaqtarǵa erekshe áser etti. Týrnırdi ótkizý úshin arenada ulttyq naqyshtaǵy aıryqsha trassa ornatyldy. Árbir qatysýshy beınekózildiriktiń kómegimen óz dronyn basqardy.
«Bul kózildirikke dıspleı ornatylǵan, ol dronnan beıneni kórsetedi, osylaısha, onyń qaıda ushyp bara jatqanyn kórýge bolady. Men jarysqa arnap kishkentaı dron daıyndap qoıdym, ol óte shapshań. Mundaı jarystar búkil álem boıynsha ótkiziledi, bizdiń de elordadaǵy osyndaı alǵashqy chempıonatqa kelgenimiz qýantady», - deıdi Almatydan kelgen qatysýshy Andreı Manko.
Sondaı-aq, munda Drone Expo Kazakhstan - 2016 ushqyshsyz basqarylatyn ushý apparattarynyń jáne robototehnıka kórmesi uıymdastyryldy. Qonaqtar drondardyń túrli úlgilerimen tanysyp, sheberlik dáristerine qatysýǵa múmkindik aldy.