Jas mamandardy baspanamen qamtý úshin 21 mlrd teńgeden astam qarajat bólindi

ASTANA. QazAqparat - Jas mamandardy baspanamen qamtý úshin 21 mlrd teńgeden astam qarajat bólindi. Bul týraly búgin Úkimet otyrysynda «Nurly jer» baǵdarlamasy boıynsha baıandama jasaǵan QR Indýstrııa jáne ınfraqurylymdyq damý mınıstri Roman Sklıar aıtty, dep habarlaıdy QazAqparat tilshisi.

«Memleket basshysynyń «Jastar jylynyń» ashylýy kezinde bergen tapsyrmalaryn iske asyrý aıasynda 2019 jylǵa Astana, Almaty jáne Shymkent qalalarynda jumys isteıtin jastar úshin 1 myń jaldamaly páter qurylysyna 7,2 mlrd teńge qarastyryldy. Osylaısha, jas mamandar úshin 3 jylda 3 myń páterdiń qurylysyna 21,6 mlrd teńge qarastyrylyp otyr», - dedi Roman Sklıar.

Mınıstrdiń aıtýynsha, bıýdjetke qatysty barlyq máselelerdi Respýblıkalyq bıýdjet komıssııasy maquldady jáne Májilistiń qaraýynda.

Aıta keteıik, Jastar jylynyń ashylýyna arnalǵan saltanatty jıynda Elbasy Nursultan Nazarbaev Astana, Almaty jáne Shymkent qalalarynda jastar úshin jylyna 1 myń páter salynatyndyǵyn aıtqan edi.