«Jas maman» jobasy Aqmola oblysynda qalaı júzege asyrylyp jatyr

KÓKShETAÝ. QazAqparat – Aqmola oblysynda «Jas maman» jobasyna respýblıkalyq irikteý baıqaýy arqyly 11 kolledj tańdap alynyp otyr, dep habarlaıdy QazAqparat tilshisi oblystyq bilim basqarmasynyń baspasóz qyzmetine silteme jasap.

Vedomstvonyń málimetinshe, joba qolǵa alynǵanyna bıyl 2 jyl boldy. 2020 jyly «Jas maman» jobasyna oblystyń 5 kolledji qatysty. Bular Kókshetaý qalasyndaǵy joǵary tehnıkalyq kolledj, qurylys-tehnologııalyq kolledji, Şýche qalasyndaǵy joǵary tehnıkalyq kolledj, Shaǵalaly kentindegi joǵary agrotehnıkalyq kolledj jáne Stepnogor qalasyndaǵy ındýstrııalyq-tehnıkalyq kolledji.

«Joba aıasynda 5 kolledjge zamanaýı oqý jabdyqtaryn satyp alý úshin respýblıkalyq bıýdjetten 1,6 mıllıard teńgeden astam qarajat bólindi. Sondaı-aq, oblystyq bıýdjet esebinen 80 mıllıon teńgege qarjylandyryldy. Bul qarjyǵa 18 mamandyq jáne 33 biliktilik boıynsha mamandardy daıarlaý úshin qajetti jabdyqtar satyp alyndy. Bul mashına jasaý tehnologııasy, ǵımarattar men qurylystardy salý jáne paıdalaný, tamaqtandyrýdy uıymdastyrý, sáýlet, jıhaz óndirisi, tehnıkalyq qyzmet kórsetý, jóndeý jáne ónerkásipte paıdalaný jáne basqalar sııaqty mamandyqtar», - dedi vedomstvodan.

Sonymen birge, aǵymdaǵy jyly oblystyń taǵy 6 kolledji «Jas maman» jobasyna qatysyp otyr. Bulardyń arasynda Atbasardaǵy agrarlyq-ındýstrııalyq kolledji, Krasnoıar kentindegi agrotehnıkalyq kolledj, Şýchedegi orman sharýashylyǵy, ekologııa jáne týrızm joǵary kolledji, Stepnogordegi taý-ken tehnıkalyq kolledji, Kókshetaýdaǵy Aqan seri atyndaǵy joǵary mádenıet kolledji, Astrahandaǵy agrotehnıkalyq kolledji bar.

Bul jobaǵa respýblıkalyq bıýdjetten 1,7 mıllıard teńge, oblystyq bıýdjetten 170,3 mıllıon teńge bólindi.

«Búgingi kúni barlyq 6 kolledj boıynsha jabdyqtar satyp alý úshin memlekettik satyp alý jarııalandy. Qazirgi zamanǵy oqý-óndiristik jabdyqtardy satyp alý 13 mamandyq jáne 20 biliktilik boıynsha júzege asyrylady. Bul jylý elektr stantsııalarynyń jylý energetıkalyq qondyrǵylary, marksheıderlik is, paıdaly qazbalardy baıytý, aýyl sharýashylyǵy tehnıkasyna tehnıkalyq qyzmet kórsetý jáne jóndeý, orman sharýashylyǵy, baý-saıabaq jáne landshaftyq qurylys, ónerkásiptegi elektromehanıkalyq jabdyqtar sııaqty mamandyqtar», - dedi vedomstvodan.

Aıta keteıik, jalpy «Jas maman» jobasynyń oblystaǵy tehnıkalyq jáne kásiptik bilim berý júıesine qoldaýy zor.

2025 jylǵa deıin halyqaralyq standarttardy jańǵyrtý jáne engizý nátıjesinde oblystyń 11 kolledji WorldSkills standarttaryna sáıkes tıisti mamandyq boıynsha quzyrettiń salalyq ortalyqtaryna aınalady.