«Jas maman» baǵdarlamasy ázirlenip jatyr - Dáýren Abaev

NUR-SULTAN. QazAqparat - «Jas maman» baǵdarlamasy aıasynda 200 myń jas mamandyq ıgeretin bolady. Bul týraly búgin Úkimet otyrysynda Jastar jylyn ótkizý jónindegi jol kartasy týraly baıandaǵan Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

«Búgingi tańda jol kartasynyń jobasy 89 tarmaqtan turady, bes baǵyt bar. Birinshi baǵyt - Eńbek etip júrgen jastardy baspanamen qamtamasyz etý. Nur-Sultan, Almaty men Shymkent qalalarynda jyl saıyn jas mamandarǵa arnalǵan myńǵa jýyq arendalyq turǵyn úı turǵyzý josparda bar. Ol baspanalar kásiporyndarda, aýyl sharýashylyǵy men bıýdjettik mekemelerde, ǵylym salasynda jumys isteıtin jas mamandarǵa, isin endi bastaǵan kásipkerlerge arnalyp salynady. Taǵy bir erekshe atap óterligi otbasyndaǵy bala sany, múmkindigi shekteýli, arnaıy kútimdi qajet etetin bala tárbıelep otyrǵandar, tolyq emes otbasylar jáne taǵy basqa faktorlar eskeriletin bolady», - dedi D.Abaev.

Onyń aıtýynsha, ekinshi baǵyt jastardy eńbekpen qamtýdy kózdeıdi. Osyǵan oraı «Jas kásipker» baǵdarlamasyn júzege asyrý qarastyrylǵan. Úsh jyldyń ishinde 60 myń jas azamat kásipkerlik negizderi boıynsha oqytylady. Aýyldaǵy jastarymyzǵa arnaıy 15 myń shaǵyn nesıe berý josparlanǵan. Al jańa bıznes ıdeıalardy júzege asyrý úshin 30 myńnan asa memlekettik granttar bólinedi.

«Úshinshi baǵytta bilim berý men eriktiler uıymdaryn damytý jospary bar. Qazir «Jas maman» dep atalatyn baǵdarlama ázirlenip jatyr. Osy baǵdarlama arqyly suranysqa ıe 100 ındýstrıaldy jáne servıstik kásipter boıynsha mamandar daıyndalady. Bul baǵyttaǵy jumystar elimizdegi 20 aldyńǵy qatarly joǵary oqý oryny men 180 kolledj bazasynda júzege asyrylady. Úsh jyldyń ishinde elimizdiń barlyq aımaqtarynda 200 myń jas azamatty oqytyp shyǵarý kózdep otyrmyz», - dedi ol.

Sonymen qatar ol tórtinshi baǵytta jastardyń áleýmettik belsendiligin damytý kózdeletindigin aıtty.

«Bul baǵytty «Jasyl el» qozǵalysynyń «Jasyl qala», «Jasyl aýyl» ortaq ulttyq jobasynyń aıasynda júzege asyrý qarastyrylyp otyr. Qurylys kompanııalarda stýdenttik qurylys otrıadtary úshin kvota bólinedi. 2025 jylǵa deıingi áskerı-patrıottyq baǵdarlama jáne taǵy da basqa baǵdarlamalar ázirlenedi. Besinshiden jas otbasylardy densaýlyq pen áleýmettik ınklıýzıvti qoldaý týraly baǵyt bar», - dedi mınıstr.