Jas kóshbasshylar el jastaryn «100 jańa esim» jobasyna qatysýǵa shaqyrady

ASTANA. QazAqparat - Jastar uıymdarynyń kóshbasshylary el jastaryn «100 jańa esim» jobasyna qatysýǵa shaqyrady. Atalǵan joba jastarǵa tanymal bolyp qana qoımaı, óz múmkindikterin iske asyrý men elimizdiń damýyna úles qosýy jolynda mańyzdy, dep habarlaıdy QazAqparat tilshisi.

Búgin Astanada «Jastar» ǵylymı-zertteý ortalyǵynyń bazasynda  «Qazaqstannyń 100 jańa esimi» jobasyn elimizdiń jastary arasynda keńinen nasıhattaý maqsatynda kezdesý ótti. Kezdesýge jastarmen qosa elimizdegi jastar uıymdarynyń basshylary, belsendileri, sol sııaqty  «100 jańa esim» jobasynyń ótken jylǵy jeńimpazdary qatysty.

«Elbasynyń «Rýhanı jańǵyrý» baǵdarlamalyq maqalasynyń aıasynda 6 baǵyt boıynsha jobalar júzege asyrylýda. Sonyń biri - «100 jańa esim» jobasy. Bizde 18 mln halyq bolsa, sonyń 4 mln-y - jastar. Búgingi kezdesýdiń maqsaty - atalǵan jobaǵa sol jastardy kóptep tartý. Óıtkeni bul jobanyń maqsaty belgili bir salanyń basyn ustap jetistikke jetken, óz bolashaǵyn ózi jasap qana qoımaı, elimizdiń damýyna úles qosqan azamattardy el aldyna shyǵarý. Al bizde bul qatardaǵy jastar barshylyq, kóbisi olardy bile bermeıdi. Biz solardy osy jobaǵa belsene qatysýǵa shaqyramyz», - dedi QR Qoǵamdyq damý mınıstrligi Jastar jáne otbasy isi jónindegi komıtettiń basshysy qyzmetin atqarýshy Ashat Oralov.

Budan burynyraq habarlaǵanymyzdaı elimizde «100 jańa esim» jobasynyń ekinshi kezeńine ótinim qabyldaý bastaldy.