Jas kombaınshy: Qatarlas dostarymdy aýylda eńbek etýge shaqyramyn

<p>QYZYLORDA. KAZINFORM - Qyzylorda oblysy Jalaǵash aýdanyna qarasty Tań aýylynda turatyn 26 jastaǵy Nurdáýlet Jumaǵul sharýashylyqta kúrishshi jáne kombaınshy bolyp eńbek etedi. Jastaıynan qyzý eńbek ortasynda ósken ol ózgeler sekildi aýyldan uzap ketken joq. Bala kezinen kózi kórip ósken tirshilik qazanyna qaınap, búginde sharýashylyqtyń tájirıeli mamanyna aınalyp keledi. Kazinform tilshisi kombaın tizginin ustap, qyrmandy altyn dánge toltyryp júrgen qarapaıym eńbek adamynyń bir kúngi tynys-tirshiligine zer salyp kórgen edi.</p>

- Syr óńirinde taǵy bir jaýapty maýsym máresine jetip keledi. Bıyl egin-terim jaǵdaıy qalaı bolyp jatyr?

- Jergilikti aýa raıy men topyraqtyń tuzdylyǵyna baılanysty kúrish daqyly erekshe kútimdi qajet etetini belgili. Oǵan qosa sońǵy jyldarda aımaqta sý tapshylyǵy máselesi týyndap júr. Soǵan qaramastan eldegiler mol nesibege negiz qalap keledi. Qandaı qıyndyqpen betpe-bet kelse de, ony artta qaldyryp, tolaıym tabysqa jol ashady. Biz úshin jazǵy ýaqyt – asa jaýapty kezeń. Durys kútim bolmasa, kúrishten mol ónim alý múmkin emes. Sondyqtan bul ýaqytta aýyldaǵy eginshiler úshin tynbaı jumys jasap, eseli eńbek maıdany qyza túsedi. 

Foto: Ádiljan Úmbet/Kazinform

Ózim jumys jumys isteıtin «Tań LTD» jaýapkershiligi shekteýli seriktestiginde maǵan 45 gektar alqap bekitilgen. Keıingi jyldarda sharýashylyqta reseılik aımaqta «ıAntar», «Lıder» sorttaryna egilip keledi. Men ózime bekitilgen alqaptan «Kaýrıs» sortynan ár gektardan 94,5 tsentnerden ónim jınadym. Jalpy alǵanda, sharýashylyqta 2800 gektar kúrish alqaby bar. Orta ónim gektaryna 77,7 tsentnerden aınalyp jatyr.

- Rasyn aıtý kerek, qazir aýyldyq jerden jastardy tabý qıyn. Olardyń kóbisi mektep bitirgennen keıin joǵary oqý ornyna túsip ketedi. Bolmasa, nápaqa tabý úshin qalany jaǵalaıdy. Al egin sharýashylyǵynda negizinen jasy úlken kisilerdiń eńbek etýine kózimiz úırenip qalǵan. Seniń aýylda qalýyńa ne sebep boldy?

- Burynǵy jyldarda «Aýyldyq jerde jaǵdaı joq» degen qasań qaǵıda qalyptasyp qalǵan edi. Qazir ol pikirdiń joıylyp kele jatqany qýantady. Ras, keıbir kezeńde jaǵdaıdyń qıyn bolǵanyn jasyra almaımyz. Keıbir sharýashylyqta jalaqy máselesi túıtkildi taqyryp boldy. Ony ýaqytynda ala almaıtyn edik. Qazir jaǵdaı múldem basqasha. 

Foto: Ádiljan Úmbet/Kazinform

Bizdiń sharýashylyq aımaqtaǵy irgeli qurylymnyń birine aınalyp keledi. Kúrish óndirisinde úlken tabystarǵa kenelip júr. Eńbekkerlerge jalaqy der kezinde beriledi. Odan artyq ne kerek? Búginde aýyldyń kelbeti de jaqsara tústi. Sharýashylyq tarapynan aýyldy kórkeıtý-kógaldandyrý, abattandyrý jaǵdaıyna basa nazar aýdarylǵan. Bul kórinis syrttan kelgen adamǵa birden kózge túsedi. Osydan on-on bes jyl buryn ol kóbimiz úshin tańsyq bolatyn. Sondyqtan ózimmen qatarlas dostarymdy aýylda eńbek etýge shaqyramyn. Biz eldiń erteńi emespiz be? Aýylda bolsyn, qalada bolsyn, elimizdi kórkeıtýge kúsh salsaq, ol – bizdiń abyroıly mindetimiz.

- Óziń úshin bir kúngi eńbek yrǵaǵy qalaı órbıdi?

- Aýyl adamy úshin kúndelikti tirshilik tań qylań bergen ýaqyttan bastalady emes pe? Eńbekke aralasqan ýaqyttan beri sol is-áreket kúndelikti daǵdymyzǵa aınaldy. Solaı bolatyn jóni bar. Qyrýar tirshilik seni kútip turmaıdy. Kóktem mezgilinde der ýaqytynda daqyldy egip úlgerýiń tıis. Sonyń nátıjesinde kúzgi mezgilde astyqty ýaqytyly jınap alýǵa múmkindik týady. Shynyn aıtqanda, kúrish daqyly erekshe kútimdi qajet etetini belgili. Egilgen sátten bastap tabany sýdan bosamaıdy. Sol arqyly daqyl boıyn tiktep, mol ónimge negiz qalaıdy. Al tamyz aıaq sheninen qazan aıynyń ortasyna deıin oraq belsendi júredi. Taǵy bir mańyzdy maýsymdy aıaqtap, endi-endi eńbekten boı jazyp jatqan jaıymyz bar. Áli de atqarylatyn jumystar bar. Qyrmanǵa quıylǵan astyqty sapaly óndep, tutynýshy talǵamyna saı ónim óndirýge kóńil bóledi. Qysqasy, jyl boıyna jalǵasqan tirshilik aýany bar bizde. 

Foto: Ádiljan Úmbet/Kazinform

Bizdiń aýyl kúrish sharýashylyǵymen aınalysyp kele jatqanyna qanshama jyldyrdyń júzi boldy. Kezinde sol tirshilikti bizdiń ákelerimiz, aǵalarymyz jasady. Endi sol jarasymdy úrdis bizdiń býynǵa jalǵasyp otyr.

- Aýyldyń qazirgi bet-beınesi qandaı?

- Eki qolǵa bir jumys qashanda tabylady ǵoı. Qazir qala men aýyldyń aıyrmashylyǵy joq. Syr óńirinde eldi mekenderdiń basym kópshiligine gaz tartyldy. Túgelge derlik taza aýyz sýmen qamtylǵan. Jol, elektr máselesi de oń sheshimin taýyp otyr. Sondaı-aq aýyl sharýashylyǵynda jemisti eńbek etip júrgen sharýashylyqtar eldi mekenderdi damytýǵa belsendi túrde qatysa bastady. Nátıjesinde qazir keıbir aýyldarda kórkeıtý-kógaldandyrý máselesi oń sheshimin tapty. Jastardyń demalysyna arnalǵan alleıa, stadıondar, mádenıet úıleri boı kóterdi. Osyndaı jaqsy isterdiń bir kórinisin bizdiń aýyldan da kezdestirýge bolady. 

Ózim aýylda qarashańyraqta anam jáne qaryndasymmen birgemin. Men úshin týǵan topyraqta ómir súrý tartymdy kórinedi. Sondyqtan jastardy aýyldy damytýǵa shaqyramyn. Qaı jerde júrsek te, táýelsiz elimizdiń týyn bıikke kóterip, nátıjeli is atqarý – barlyǵymyz úshin mindet.

- Áńgimeńe raqmet.