«Jas kásipker» jobasy aıasynda jastarǵa 32 mlrd teńge shaǵyn nesıe, grant retinde beriledi
«Osy qujatqa sáıkes jastardy sapaly ári qoljetimdi bilimmen, turǵyn úımen, jumyspen qamtamasyz etýge, jas otbasylardy qoldaýǵa baǵyttalǵan birqatar naqty shara kózdelgen. Bul óte mańyzdy qadam. Sonymen qatar birneshe máselege nazar aýdarý qajet. Birinshiden, ákimdikter tıisti mınıstrliktermen birge jastarǵa jyl saıyn keminde 1 myń jaldamaly páter berý jónindegi jumysty kúsheıtýi kerek. Ekinshiden, jastardy jumyspen qamtý máselesin baqylaýda ustap, jastar arasynda kásipkerlikti damytý qajet. Bul úshin jol kartasynda jumys istemeıtin, ózin-ózi jumyspen qamtyǵan jastarǵa «Jas kásipker» jobasy aıasynda shaǵyn nesıeler men granttar berý jóninde birqatar shara kózdelgen. Atalǵan jobaǵa 32 mlrd teńgeden astam qarjy bólindi», - dedi Úkimet basshysy Asqar Mamın jol kartasyn talqylap bolarda.
Úshinshiden, Premer-Mınıstr atalǵan jol kartasynda «Jas maman» jobasy aıasynda suranys bar 100 kásip boıynsha 200 oqý orny, onyń ishinde 180 kolledj ben 20 JOO-ny jańartýǵa 57 mlrd teńgeden astam qarajat kózdelgen aıtty.
«Sondyqtan Bilim jáne ǵylym, Eńbek jáne halyqty áleýmettik qorǵaý mınıstrlikterine óńirlerdiń ákimdikterimen birge osy jobaǵa qatysatyn oqý oryndaryn, kásipter tizbesin aıqyndaý qajet. Aqparat jáne qoǵamdyq damý mınıstrligi tıisti meımlekettik organdarmen, jáne ákimdiktermen jol kartasyn sapaly iske asyrý úshin barlyq qajetti sharalardy qoldansyn», - dedi Asqar Mamın.
Al Úkimet basshysynyń orynbasary Gúlshara Ábdiqalyqova qazirgi kezde Senatta bıýdjetke ózgerister qaralyp jatqanyn, bıýdjette 24,6 mlrd teńge qosymsha qaralyp otyrǵanyn aıtty.
«Eń basty másele - qazir jastardy jumysqa tartý, is bastaý úshin grant berý, kómektesý, jastar tájirıbesine asa kóńil bólý. Sondyqtan bul máseleler tek áleýmettik mınıstrlikter ǵana emes, barlyq mınıstrlikterge qatysty bolyp otyr. Sondyqtan áriptesterdi Jastar jylyna baılanysty jaqsy qoldaý kórsetýge shaqyramyn», - dedi ol.
Osydan keıin Premer-Mınıstr Jastar jylyn ótkizý jónindegi jol kartasyn maquldaý týraly qaýly jobasyn daýys berýge shyǵaryp, ony Mınıstrler kabınetiniń músheleri biraýyzdan qoldady.